Post News Media ព័ត៌មានជាតិ រថយន្ត​សណ្តោង...

រថយន្ត​សណ្តោង​ធុនធំ​របស់ក្រុម​ហ៊ុន​ផែស្ងួត​ តេង​ ឡាយ ពាក់ស្លាកលេខ​ ភ្នំពេញ​3A-0671 បើកបត់ផ្លូវមិន​ប្រយ័ត្ន​ទៅកៀរ​ម៉ូតូ​មួយគ្រឿង​ ​បណ្តាល​ឲ្យ​រង​ការ​ខូចខាត​

ភ្នំពេញ: ករណីគ្រោះថ្នាក់ចរាចរណ៍ រវាងរថយន្ត​សណ្តោងធុន​ធំ​ បើកចូលក្នុងក្រុង​ខុសម៉ោង កំណត់ ទៅកៀរនិងកិនម៉ូតូមួយគ្រឿង ​ដែលធ្វើដំណើរ​ស្របទិសគ្នា​ កាលពីវេលា​ម៉ោង​៧ និង៥០នាទី​យប់​ថ្ងៃទី​១៩​ ខែធ្នូ​ ឆ្នាំ​២០១៨ ត្រង់ចំណុច​ស្តុប​ទេព​ផន​ តាមបណ្តោយផ្លូវ​ម៉ៅសេទុង​ ស្ថិត​ក្នុង​សង្កាត់​ផ្សារ​ដេប៉ូ​ទី​១​ ខណ្ឌ​ទួលគោក​។

តាមប្រភពព័ត៌មាន​ពីកន្លែងកើតហេតុ បាន​ឲ្យ​ដឹងថា នៅមុនពេលកើតហេតុ គេ​ឃើញ​បុរស​ម្នាក់ ​បើកបរ​រថយន្ត​សណ្តោងធុនធំមួយគ្រឿង​ម៉ាក​ NISSAN DIESEL ពណ៌​សំបក​ឪឡឹក​ ជារថយន្ត​របស់ក្រុមហ៊ុន​ផែ​ តេង​ ឡាយ​ ពាក់ស្លាកលេខ​ ភ្នំពេញ​3A-0671 ធ្វើដំណើរ​តាមបណ្ដោយ​ផ្លូវ​ម៉ៅសេទុង​ ក្នុង​ទិសដៅ​ពី​ត្បូង​ទៅ​ជើង​ អំទ្បុងពេលមានយានយន្តធុនតូចជាច្រើន កំពុងធ្វើចរាចរណ៍យ៉ាង​មមាញឹក​។

លុះមកដល់​ចំណុច​កើត​ហេតុ ​រថយន្ត​សណ្តោងធុនធំខាងលើ ​ក៏​បាន​បត់​ស្ដាំ​ទៅផ្លូវ១៨២​ បំណងឆ្ពោះទៅផ្សារដេប៉ូ​ តែដោយ​រថយន្ត​ ​បើកបត់​ខ្វះ​ការ​ប្រុងប្រយ័ត្ន​ ក៏​ជ្រុល​ទៅ​កៀរ​និងកិនពីលើម៉ូតូមួយគ្រឿង ​ម៉ាក​ ហុងដាស្កុបភី​ ពណ៌​ក្រហម​ ពាក់​ស្លាក​លេខ​ ភ្នំពេញ​1AH-9859​ បើក​បរ​ដោយ​នារី​ម្នាក់​ កំពុង​ឈប់​ទន្ទឹម​ខាងស្តាំ​រថយន្ត ​បណ្តាល​ឲ្យ​ម៉ូតូ​រង​ការ​ខូចខាត​វៀចដៃចង្កូត ​និង​វៀចបូមខាងមុខ​ ចំណែកឯ​នារី​ដែល​ជាអ្នកបើកបរ​រង​របួស​ស្រាល​ប៉ុណ្ណោះ។

ក្រោយ​កើត​ហេតុ​សមត្ថកិច្ច​មូល​ដ្ឋាន ​​បាន​ចុះ​មក​ដល់​កន្លែង​និងបានឲ្យភាគី​ទាំងពីរ​ធ្វើការ​ដោះស្រាយ​គ្នា​ ដោយមានតំណាង​ភាគី​ខាងរថយន្តបង្ក ​​ចេញ​មុខ​មក​ធ្វើការចរចា​សម្របសម្រួល​គ្នា ​ជាមួយ​និង​ភាគី​ខាង​ម៉ូតូ​ ដោយ​ភាគី​ខាង​ម៉ូតូ​ មិន​ចង់​មាន​រឿង​វែង​ឆ្ងាយ ​ក៏​ឲ្យ​ភាគី​ខាង​រថយន្តបង្ក​ យក​ម៉ូតូ​របស់ខ្លួន ទៅជួសជុល ​ដើម្បី​បញ្ចប់​រឿង​នៅ​និង​កន្លែង​កើត​ហេតុ​៕