Post News Media ព័ត៌មានជាតិ បុរស២នាក់ លង់...

បុរស២នាក់ លង់ទឹកស្លាប់ថ្ងៃជាមួយគ្នា ខណ:ដែលម្នាក់ទៅដាក់មងនិងម្នាក់ទៀតស្រវឹងស្រាជិះកង់ធ្លាក់ចូលប្រឡាយ!

បន្ទាយ​មាន​ជ័យ: ​យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា បុរស​២​នាក់​ បាន​លង់ទឹក​ស្លាប់​ក្នុង​ខេត្តបន្ទាយមានជ័យ​ ក្នុង​ព្រឹត្តិការណ៍​ដាច់​ដោយឡែក​ពី​គ្នា​។​ ហេតុការណ៍​លង់ទឹក​ស្លាប់​នេះ​ បាន​កើតឡើង​នៅ​ថ្ងៃ​ទី​១៩​ធ្នូ​ ដោយហេតុ​ការណ៍​មួយ​កើត​នៅ​ស្រុក​ព្រះនេត្រព្រះ​ និង​ហេតុការណ៍​មួយទៀត​នៅ​ស្រុក​មង្គល​បូ​រី​។​

​លោក​វរសេនីយ៍ឯក​ មាស​ ប្ញ​ទ្ធី​ អធិការ​នគរបាល​ស្រុក​ព្រះនេត្រព្រះ​ បាន​ឲ្យ​ដឹង​ថា​បុរស​លង់ទឹក​ស្លាប់​ក្នុងស្រុក​ ព្រះនេត្រព្រះ​ ឈ្មោះ​ ចេ​ង​ ប្រុស​ អាយុ​៤៥​ឆ្នាំ​ ដែល​រស់នៅ​ភូមិ​ជើងវត្ត​ ឃុំ​ព្រះនេត្រព្រះ​។​ ឈ្មោះ​ចេ​ង​ ប្រុស​ នៅ​វេលា​ម៉ោង​ប្រមាណ​២​ទៀប​ភ្លឺ​ បាន​ក្រោក​ទៅ​មើល​មង​ដាក់​ត្រី​ទឹក​ក្នុង​ទឹក​ជម្រៅ​២,២០​ម៉ែត្រ​ នៅ​អូរ​តា​ជ្រាំ​ ស្ថិត​ក្នុង​ឃុំ​ព្រះនេត្រព្រះ​ ស្រុក​ព្រះនេត្រព្រះ​។​ ប្រពន្ធរបស់​ជន​រង​គ្រោះ​ បាន​ឲ្យ​ដឹង​ថា​ ដោយ​បាត់​ប្តី​យូរ​ គាត់​បាន​ទៅ​តាម​រក​នៅ​កន្លែង​ដាក់​មង​ តែ​រក​មិនឃើញ​ក៏​ត្រឡប់​មក​ផ្ទះ​វិញ​។​ ក្រោយមក​គាត់​បាន​រក​បងប្អូន​ ក្នុងភូមិ​ចំនួន​ពី​ ៧-៨​នាក់​ ឲ្យទៅ​ជួយ​តាម​រក​នៅ​កន្លែង​ដាក់​មង​ម្ដងទៀត​ លុះដល់​វេលា​ម៉ោង​២​រសៀល​ ថ្ងៃ​ទី​១៩​ធ្នូ​ដដែល​ នៅ​ពេល​ចុះ​ទៅ​រក​ម្តងទៀត​ ក៏​ឃើញ​សាកសព​លោក​ ចេ​ង​ ប្រុស​ រុំ​ដោយ​សាច់​មង​ស្លាប់​ នៅ​ក្នុង​ទឹក​។​ សមត្ថកិច្ច​បាន​ធ្វើ​កោសល្យវិច័យ​លើ​សាកសព​ និង​ធ្វើការ​សន្និដ្ឋាន​ថា​ ការ​ស្លាប់​នេះ​ ពិតជា​ស្លាប់​ដោយសារ​ការ​លង់ទឹក​ពិតមែន​។​

​ក្នុង​ហេតុការណ៍​លង់ទឹក​ស្លាប់​ក្នុងស្រុក​មង្គលបុរី​នោះ​វិញ​ សមត្ថកិច្ច​បានឲ្យ​ដឹង​ថា​ សាក្សី​អាយុ​៣៧​ឆ្នាំ​ ឈ្មោះ​ អឿ​ សា​រ៉ាត់​ នៅ​ភូមិ​បឹង​ត្រស់​ ឃុំ​ចំណោម​ នៅ​ម៉ោង​១៥​និង​៥៤​នាទី​ ថ្ងៃ​ទី​១៩​ធ្នូ​ បាន​ដើរទៅ​មើល​ស្រែ​នៅ​ខាងត្បូង​ភូមិ​ ចម្ងាយ​១០០០​ម៉ែត្រ​ បាន​ប្រទះ​ឃើញ​សព​របស់​ឈ្មោះ​ ចាន់​ នឿ​ត​ ភេទ​ប្រុស​ អាយុ​៤៤​ឆ្នាំ​ បាន​ស្លាប់​ក្នុង​ ទឹក​ប្រឡាយ​ ។​ មេ​ភូមិ​និង​ពលរដ្ឋ​បានឲ្យ​ដឹង​ថា​ ជន​រង​គ្រោះ​ ជា​មនុស្ស​ស្រវឹង​ខួប​ ហើយ​រស់នៅ​ម្នាក់ឯង​ គ្មាន​ប្រពន្ធ​ កូន​នៅ​ជាមួយ​ទេ​ ។​ សាក្សី​បាន​បញ្ជាក់​ថា​ ជន​រង​គ្រោះ​មុន​ហេតុការណ៍​កើតឡើង​ បាន​ទៅ​លើក​មង​ និង​បាន​ជិះ​កង់​ធ្លាក់​ចូល​ក្នុង​ទឹក​ប្រឡាយ​បណ្តាល​ឲ្យ​លង់ទឹក​ស្លាប់​។​

​សមត្ថកិច្ច​ជំនាញ​ បាន​សន្និដ្ឋាន​ថា​គាត់​ បាន​ស្រវឹងស្រា​ ហើយ​ជិះ​កង់​ធ្លាក់​ចូល​ក្នុង​ប្រឡាយ​បណ្តាល​ឲ្យ​លង់ទឹក​ស្លាប់​ ៕