Post News Media ព័ត៌មានជាតិ Update៖ រន្ធត...

Update៖ រន្ធត់ទាំងព្រឹក..​ដោយសារគ្រោះថ្នាក់ចរាចរណ៍ ស្លាប់ម្នាក់និងរងបួសធ្ងន់ម្នាក់ នៅខណ្ឌដង្កោ!

ភ្នំពេញ: នៅវេលាម៉ោង៩ព្រឹក ថ្ងៃទី២០ ខែធ្នូ ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើងរវាង​ម៉ូតូរ៉ឺម៉កដឹកដែក បានដាច់កង់ម្ខាង ហើយក៏រេចង្កូត ទៅបុកជាមួយនឹងរថយន្តសាំយ៉ុង ដឹកកម្មករមួយគ្រឿង ដែលកំពុងធ្វើដំណើរបញ្ច្រាសទិស​គ្នា រួចរថយន្តបើកគេចរេចង្កូតក៏បុកជាមួយនឹងម៉ូតូមួយគ្រឿងទៀត បណ្ដាលឲ្យបុរសម្នាក់ជាម្ចាស់ម៉ូតូរ៉ឺម៉ក​ស្លាប់​​ និងស្ត្រីម្នាក់(ជិះម៉ូតូមួយគ្រឿងទៀត ៣នាក់ប្តីប្រពន្ធនិងកូន)រងរបួសធ្ងន់ នៅ​​តាមបណ្ដោយផ្លូវបេតុង មុខវត្តកំពែង សង្កាត់ព្រៃស ខណ្ឌដង្កោ រាជធានីភ្នំពេញ។

ម្ចាស់រថយន្តសាំយ៉ុងមាន​ឈ្មោះ ហ៊ុន ង៉ែតម៉ឺន ភេទប្រុស អាយុ៣៥ឆ្នាំ មុខរបរ បើកបររថយន្តដឹកកម្មករ​។ ចំណែក​អ្នកដែល​ស្លាប់ និងអ្នករងរបួសធ្ងន់នោះ មិនត្រូវបានស្គាល់អត្តសញ្ញាណ​នៅឡើយនោះទេ។

​ក្រោយពេលកើតហេតុ សមត្ថកិច្ចបានចុះទៅកន្លែងកើតហេតុ និងធ្វើការវាស់វែង និងឃាត់ខ្លួនម្ចាស់រថយន្ត រួចធ្វើការស្ទូចយករថយន្តនិងម៉ូតូ មករក្សាទុកនៅ​​ការិយាល័យនៃស្នងការដ្ឋាននគរបាល រាជធានីភ្នំពេញ ដើម្បី​រង់ចាំដោះស្រាយគ្នាតាមផ្លូវច្បាប់។

ចំណែក​សាកសពជនរងគ្រោះ ត្រូវបានសមត្ថកិច្ច​ដឹកយកទៅតម្កល់ទុកនៅវត្តតាំងក្រសាំង ដើម្បីរង់ចាំសាច់ញាតិ មកទទួលយកទៅធ្វើបុណ្យ៕