ភ្នំពេញ: ប្តីប្រពន្ធមួយគូទៅលេងក្មួយៗសងលុយលុះត្រឡប់មកវិញហើយត្រូវចោរឆក់ អស់ជាង១ម៉ឺន២ពាន់ដុល្លារ បង្កឲ្យមានការភ្ញាក់ផ្អើលកាលវេលម៉ោង ១០និង៤០នាទីយប់ថ្ងៃទី២០ ខែធ្នូ ឆ្នាំ២០១៨ ស្ថិតនៅតាមបណ្ដោយផ្លូវសហព័ន្ធរុស្ស៊ី ទល់មុខក្លោងទ្វារ វត្តពោធិ៍ចិនតុង ដែលស្ថិតនៅសង្កាត់កាកាបទី១ ខណ្ឌពោធិ៍សែនជ័យ ។
ជនរងគ្រោះ ឈ្មោះ ផាន់ នឿន ភេទស្រី អាយុ៤៦ឆ្នាំ មុខរបរ លក់ងាវ រស់នៅម្តុំត្រឡោកបែក មានស្រុកកំណើតនៅភូមិស្វាយដូនអី ឃុំស្វាយធំ ស្រុកស្វាយជ្រំ ខេត្តស្វាយរៀង។ ចំណែកឯជនសង្ស័យ ជិះម៉ូតូ២គ្រឿងមានគ្នា២នាក់ ហើយ ជនរងគ្រោះ ស្គាល់ម៉ូតូជនសង្ស័យម៉ាកឌ្រីមសង់ ពណ៌ខ្មៅ ពាក់ស្លាកលេខ ភ្នំពេញ 1HH -8829 សង់ស៊េរី ២០១៩ ។
តាមប្រភពព័ត៌មានពីស្រ្តីជាប្រពន្ធបាននិយាយប្រាប់ថាមុនពេលកើតហេតុរូបគាត់និងប្តីរបស់គាត់បានទៅលេងផ្ទះក្មួយប្រុស របស់គាត់ នៅម្តុំអូដឹម ហើយបន្ទាប់មក ក្មួយគាត់ បានសងលុយចំនួន១ម៉ឺន២ពាន់ដុល្លារឲ្យគាត់វិញ។ លុះរូបគាត់បានត្រឡប់មកផ្ទះវិញ មកដល់ចំណុចកើតហេតុ បានចូលលេង ប្អូនថ្លៃរបស់គាត់ ដែលលក់ គោដុត នៅតាមចិញ្ចើមផ្លូវ បន្ទាប់មក ស្រាប់តែឃើញជនសង្ស័យ ខាងលើ បានចូលមកដល់កន្លែងកើតហេតុដែរ ដោយធ្វើជាទិញសាច់គោដុត ចំនួន២ម៉ឺនរៀល ពេលក្មួយគាត់ ច្រក សាច់គោដុតរួចហើយ ជនសង្ស័យ មិនទាន់ទៅ ទៀត ហើយគាត់សួរថាចាំនណាគេ ហើយជនសង្ស័យឆ្លើយថា ចាំមិត្តភក្តិមកទិញស្រា។ បន្ទាប់មកស្រាប់តែជនសង្ស័យខាងលើ បានចូលមកលួចលុយរបស់គាត់ ដែលដាក់ក្នុងហោប៉ៅ ដែលខ្ចប់ក្នុងថង់ ប្លាស្ទិកពណ៌ខ្មៅ ហើយឆក់ទៅបាត់បណ្តាលឲ្យគាត់ មានការសោកស្ដាយយ៉ាងខ្លាំង ។
ក្រោយពេលកើតហេតុភ្លាមៗ នគរបាលប៉ុស្តិ៍កាកាបទី១បានមកដល់កន្លែងកើត ហើយបានឲ្យជនរងគ្រោះ ទៅដាក់ពាក្យបណ្ដឹង ដើម្បីឲ្យជួយស៊ើនអង្កេតរកមុខសញ្ញាខាងលើយកមកផ្តន្ទាទោសតាមច្បាប់៕
មតិយោបល់