Post News Media ព័ត៌មានជាតិ មិនដឹងប្រញាប់...

មិនដឹងប្រញាប់ទៅណា! បុរស២នាក់ជិះម៉ូតូលឿនដូចហោះ បុកបង្កាន់ដៃស្ពានអាកាសស្ទឹងមានជ័យ បណ្តាលឲ្យស្លាប់ម្នាក់

​ភ្នំពេញ: កាលពីវេលាម៉ោង១០និង៣០នាទីយប់ ថ្ងៃទី២៥ ខែធ្នូ ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើង ក្រោយពីមានបុរស​២​នាក់​មិនដឹង​ថា ប្រញាប់​ទៅ​ណា​ បើកម៉ូតូ​ម៉ាក​ស្កុប​ពី​យ៉ាង​លឿន​ ​ជ្រុល​ទៅ​ទាក់​ដៃចង្កូត​ជាមួយនឹង​បង្កាន់ដៃស្ពាន​អាកាស​ស្ទឹង​មាន​ជ័យ បណ្តាល​ឲ្យ​ដួល​​អូស​ជិត​៣០​ម៉ែត្រ ​​ស្លាប់ម្នាក់ពេល​បញ្ជូន​ទៅ​សង្គ្រោះ​នៅ​មន្ទីរ​ពេទ្យ និង​ម្នាក់​ទៀត​​រង​របួសធ្ងន់ នៅលើ​ស្ពាន​អាកាស​ស្ទឹង​មាន​ជ័យ ផ្លូវ​២១៧ សង្កាត់​ស្ទឹង​មាន​ជ័យ​១ ខណ្ឌមានជ័យ រាជធានីភ្នំពេញ។

សព​ជន​រង​គ្រោះ​មានឈ្មោះ ជិន រតនា ភេទ​ប្រុស អាយុ​៣២​ឆ្នាំ ​​ស្នាក់​នៅផ្ទះ​លេខ​៤៦០​អឺ​១ ផ្លូវ​១៨៦ សង្កាត់​មិត្តភាព ខណ្ឌ​៧​មក​រា ជា​អ្នក​អង្គុយ​ខាងក្រោយ​។ ជិះ​ម៉ូតូ​ម៉ាក​ស្កុប​ពី ស៊េរី​ឆ្នាំ​២០១៨ ពណ៌​ស ពាក់​ស្លាក​លេខ ភ្នំពេញ1GN-9405​។

ក្រោយពេល​កើតហេតុ សមត្ថកិច្ចបានចុះទៅដល់កន្លែងកើតហេតុ រួច​ហើយ​បាន​ធ្វើ​លិខិត​ប្រគល់​សព​ជន​រង​គ្រោះឲ្យរថយន្ត​ដឹក​យក​តម្កល់​ទុក​នៅ​វត្ត​ទឹកថ្លា ខណ្ឌ​សែន​សុខ ដើម្បី​ស្វែងរក​សាច់ញាតិ​បងប្អូន មក​ទទួលយក​ទៅ​ធ្វើបុណ្យ​តាម​ប្រពៃណី​។ ចំណែក​ម៉ូតូ​របស់​ជន​រង​គ្រោះ​ត្រូវ​សមត្ថកិច្ច​យក​ទៅ​រក្សា​ទុក​នៅ អធិការដ្ឋាន​ខណ្ឌមានជ័យ ដើម្បី​ទុក​ប្រគល់​ឲ្យ​សាច់ញាតិ​មក​ទទួលយក​ទៅ​វិញ ៕