Post News Media ព័ត៌មានអន្តរជាតិ នាយករដ្ឋមន្ត្...

នាយករដ្ឋមន្ត្រីថៃ ព្រមានប្រឆាំងការយកឈ្មោះខ្លួន ទៅធ្វើយុទ្ធនាការបោះឆ្នោត

ថៃ: នាយករដ្ឋមន្ត្រីថៃលោក Prayut Chan-o-cha កាលពីថ្ងៃអង្គារ បានព្រមានគណបក្សនយោបាយ មិនឲ្យប្រើឈ្មោះលោក នៅក្នុងយុទ្ធនាការឃោសនា បោះឆ្នោតទ្បើយ ដោយលើកទ្បើងថា លោកមិនទាន់បានសម្រេចចិត្ត ចូលរួមជាមួយបក្សនយោបាយណាមួយទេ។ នេះបើយោងតាមសារព័ត៌មាន Bagkok Post ចេញផ្សាយនៅថ្ងៃទី២៦ ខែធ្នូ ឆ្នាំ២០១៨។

ដោយលោកបាននិយាយថា គណបក្សជាច្រើន បានបង្ហាញចំណាប់អារម្មណ៍ ក្នុងការដាក់ឈ្មោះលោកជាបេក្ខភាពនាយករដ្ឋមន្ត្រី ដ៏មានសក្តានុពល ប៉ុន្តែពួកគេគួរតែធ្វើការប្រុងប្រយ័ត្នចំពោះករណីនេះ ដោយសារលោក មិនទាន់បានធ្វើការសម្រេចចិត្តនៅឡើយ។

ក្នុងនោះលោក Prayut បាននិយាយថា ខណ:ដែលលោកមិនទាន់បានទទួលយក ការស្នើសុំដាក់ឈ្មោះលោក ជាបេក្ខភាពនាយករដ្ឋមន្ត្រី ពីគណបក្សផា​ឡាំង​ប្រា​ឆារ៉ាត (PPRP) ពួកគេមិនគួរយកឈ្មោះរបស់លោក ប្រើនៅក្នុងយុទ្ធនាការនោះទេ។

ប្រតិកម្មនេះដែរ បានកើតទ្បើងបន្ទាប់ពីយុទ្ធនាការរបស់បក្សខាងលើ កាលពីសប្តាហ៍មុននៅទីក្រុង Phitsanulok អ្នកទាំងនោះ ត្រូវបានគេមើលឃើញកាន់ផ្ទាំងក្រដាសគាំទ្រការវិលត្រឡប់របស់លោកឧត្តមសេនីយ៍ Prayut ជានាយករដ្ឋមន្ត្រី សម្រាប់ការបោះឆ្នោត ដែលគ្រោងនឹងធ្វើនៅថ្ងៃទី ២៤ ខែកុម្ភ:ខាងមុខ៕