សន្តិសុខឯកជនក្រុមហ៊ុន PHONIX ម្នាក់ ត្រូវចោរអារ.កប្លន់យកម៉ូតូបានសម្រេច ក្នុងខណ្ឌសែនសុខ!!!

ភ្នំពេញ: បុរសវ័យចំណាស់ម្នាក់ជាសន្តិសុខឯកជនក្រុមហ៊ុន PHONIX បានដេកស្លាប់ក្នុងថ្លុកឈាមយ៉ាងអាណោចអាធ័ម ខណ:ពេលដែលជិះម៉ូតូចេញពីកន្លែងធ្វើការ ហើយឆ្លៀតពេលរត់ម៉ូតូឌុប តែបែរជាឌុបចំបុរសម្នាក់ដែលជាចោរ។

ហេតុការណ៍ដ៏រន្ធត់នេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង១និង១០នាទីរំលងអធ្រាត្រ ឈានចូលថ្ងៃទី២៩ ខែធ្នូ ឆ្នាំ២០១៨ត្រង់ចំណុច ខាងមុខវត្តក្រាំងធ្នង់ តាមបណ្តោយផ្លូវ២០១១ ស្ថិតក្នុងភូមិត្រពាំងជើងស្រុក សង្កាត់ក្រាំងធ្នង់ ខណ្ឌសែនសុខ។

តាមប្រភពពីបុរសម្នាក់សូមមិនបញ្ចេញឈ្មោះដែលស្នាក់នៅជិតកន្លែងកើតហេតុបានឲ្យដឹងថានៅមុនពេលកើតហេតុ គាត់បានលឺសម្លេងពព្រុសពប្រាស់នៅខាងមុខផ្ទះរបស់គាត់។ ដោយមានការសង្ស័យ គាត់ក៏បានចេញទៅមើល ខណ:ពេលនោះក៏ឃើញបុរសរងគ្រោះខាងលើស្លៀកពាក់ឯកសណ្ឋានជាសន្តិសុខឯកជន ដោយមានរបួសចំ.កឈាមហូរស្រោចពេញខ្លួន ភ្លាមនោះគាត់ក៏ស្រែកឆោឡោ និងបានទាក់ទងទៅសមត្ថកិច្ចមូលដ្ឋានរួមទាំងរថយន្តសង្គ្រោះបន្ទាន់ឲ្យមកជួយអន្តរាគមន៍។ បន្ទាប់មកបុរសរងគ្រោះខាងលើបានប្រាប់រូបគាត់និងប្រជាពលរដ្ឋដែលបានចេញមកមើលថា«គាត់ត្រូវបានចោរអា.កប្លន់យកម៉ូតូទៅបាត់ហើយ»។ ហើយបុរសរងគ្រោះខាងលើបានប្រាប់បន្តទាំងហូរឈាមស្រោចខ្លួនថា« គាត់ជាសន្តិសុខឯកជន និងស្នាក់នៅម្តុំខាងក្រោយប៉ុស្តិ៍ទឹកថ្លា មុនពេលកើតហេតុគាត់បានជិះម៉ូតូចេញពីកន្លែងយាមនៅបុរីភ្នំពេញ(មិនបានបញ្ជាក់ថានៅម្តុំណាទេ) រួចក៏ឆ្លៀតរត់ឌុបបន្ថែម ហើយក៏បានឌុបបុរសម្នាក់ដែលជាជនសង្ស័យ លុះឌុបមកដល់ចំណុចកើតហេតុជនសង្ស័យក៏ធ្វើសមកម្មភាពយកកាំបិតមកអារ.កគាត់ប្លន់យកម៉ូតូទៅបាត់»។ បន្ទាប់មកក៏មានសមត្ថកិច្ចមូលដ្ឋាន និងមានរថយន្តសង្គ្រោះបន្ទាន់បានចុះមកដល់កន្លែងកើតហេតុ តែជាអកុសលដោយបុរសរងគ្រោះមានរបួសហូរឈាមរហូតដល់អស់ពីខ្លួន ដាច់ខ្យល់ស្លាប់យ៉ាងអាណោចអាធ័មទៅហើយ។

បើតាមសម្តីពីសមត្ថកិច្ចមូលដ្ឋានបានឲ្យដឹងថា បន្ទាប់ពីធ្វើការឆែកកាមេរ៉ាសុវត្ថិភាពដែលនៅខាងមុខផ្ទះរបស់ប្រជាពលរដ្ឋឃើញថា បុរសរងគ្រោះបានជិះម៉ូតូមួយគ្រឿងម៉ាក ហុងដាឌ្រីម ស៊េរី០១៥ និងបានឌុបបុរសម្នាក់ដែលជាជនសង្ស័យ ដោយធ្វើដំណើរតាមបណ្ដោយផ្លូវ២០១១ ក្នុងទិសដៅពីលិចទៅកើត លុះមកដល់ចំណុចខាងលើ ជនរងគ្រោះក៏បានបន្ថយល្បឿនរៀបឈប់ ខណ:នោះជនសង្ស័យដែលអង្គុយពីក្រោយបានយកកាំបិតទៅអារ.កបុរសរងគ្រោះ ហើយច្រានជនរងគ្រោះធ្លាក់ពីលើម៉ូតូ។ បន្ទាប់មកជនសង្ស័យក៏បានជិះម៉ូតូរបស់ជនរងគ្រោះរត់គេចខ្លួន ដោយភ្លាមនេះជនរងគ្រោះក៏បានព្យាយាមតោងកាងម៉ូតូរបស់ខ្លួនបណ្តាលឲ្យអូសតាមម៉ូតូប្រមាណជិត១០ម៉ែត្រទើបរបូតដៃហើយជនសង្ស័យក៏បន្ថែមល្បឿនជិះរត់គេចខ្លួនបាត់ស្រមោលទៅ។

ក្រោយពេលកើតហេតុសពបុរសរងគ្រោះត្រូវបានសមត្ថកិច្ចដឹកយកទៅតម្កល់នៅក្នុងវត្តក្រាំងធ្នង់ដើម្បីរង់ចាំធ្វើកោសល្យវិច័យ និងស្វែងរកអត្តសញ្ញាណ ដើម្បីទាក់ទងទៅសាច់ញាតិឲ្យមកទទួកយកទៅធ្វើបុណ្យទៅតាមប្រពៃណី៕