ព័ត៌មានជាតិ

​បុកទៀតហើយ! រថយន្តកុងតឺន័របុករថយន្តដឹកថ្មគ្រួស នៅផ្លូវជាតិលេខ៤

ព្រះសីហនុ: ​ កាលពីវេលាម៉ោង១និង៥០នាទីរសៀល ថ្ងៃទី០៦ ខែមករា ឆ្នាំ២០១៩ មានករណីគ្រោះថ្នាក់ចរាចរណ៍ ​​រវាងរថយន្តកុងតឺន័រនិងរថយន្តដឹកថ្មគ្រួស នៅផ្លូវជាតិលេខ៤ ម្តុំចម្ការដូងប្រេង ចន្លោះគីឡូម៉ែត្រ​១៦០-១៦១ ភូមិ តានៃ ឃុំតានៃ ស្រុកព្រៃនប់ ខេត្តព្រះសីហនុ។

រថយន្តកុងតឺន័រ ម៉ាក HINO ពាក់ស្លាកលេខ ភ្នំពេញ​3A​-​2005 បើកបរដោយឈ្មោះ ពៅ ភារុន ភេទប្រុស អាយុ(មិនច្បាស់) បើកបរក្នុងទិសដៅពីខេត្តព្រះសីហនុ ឆ្ពោះទៅ ភ្នំពេញ បុកប៉ះនឹងរថយន្ត​ម៉ាក NISSAN ពាក់ស្លាកលេខចង្កូតស្ដាំ​KPS-0251 អ្នកបើកបរមិនទាន់ស្គាល់អត្តសញ្ញាណ មានទិសដៅផ្ទុយគ្នា បណ្ដាលឲ្យឈ្មោះ ពៅ ភារុន អ្នកបើកបររថយន្តHINO រងរបួសធ្ងន់។

ក្រោយកើតហេតុ ជនរងគ្រោះបានបញ្ជូនទៅសម្រាកព្យាបាលនៅមន្ទីរពេទ្យឯកជន វាលរេញ រីឯវត្ថុតាងរថយន្តទាំង​២គ្រឿង យកមករក្សាទុកបណ្ដោះអាសន្ននៅអធិការដ្ឋាននគរបាលស្រុកព្រៃនប់។

ដោយឡែកអ្នកបើកបរ រថយន្ត NISSAN បានរត់គេចខ្លួនបាត់ក្រោយពេលកើតហេតុ ៕

មតិយោបល់