បន្ទាយមានជ័យ: កាលពីវេលាម៉ោង២និង៥០នាទីរសៀល ថ្ងៃទី០៦ ខែមករា ឆ្នាំ២០១៩ កម្លាំងជំនាញការិយាល័យប្រឆាំងបទល្មើសគ្រឿងញៀន សហការជាមួយកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានចុះប្រតិបត្តិបង្រ្កាបករណី ជួញដូរដោយខុសច្បាប់នូវសារធាតុញៀន ដោយឃាត់ខ្លួនជនសង្ស័យ២នាក់ នៅភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ជនសង្ស័យទាំង២នាក់ ទី១ឈ្មោះ ប៉ិក សែនសុវណ្ណ ភេទប្រុស អាយុ៣៩ឆ្នាំ មុខរបរ ធ្វើស្រែ និងទី២ឈ្មោះ ពេជ្រ រដ្ឋា ភេទស្រី អាយុ២៣ឆ្នាំ មុខរបរ បុគ្គលិកកាស៊ីណូ ស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងនោះដកហូតបាន៖ គ្រឿងញៀនមេតំហ្វេតាមីនទឹកកក ចំនួន១ថង់កឹប ស្មើ១០១៥.២ក្រាម, ទូរស័ព្ទដៃ២គ្រឿង,សៀវភៅធនាគារសាធារណ:របស់(ពេជ្រ រដ្ឋា)១ក្បាល,អត្តសញ្ញាណប័ណ្ណសញ្ជាតិខ្មែរ ១សន្លឹក,សៀវភៅឆ្លងដែន១ក្បាល ,ប័ណ្ណព្រំដែនកម្ពុជា-ថៃ ១ក្បាល, សៀវភៅគ្រួសារ១ក្បាល និងឯកសារពាក់ព័ន្ធមួយចំនួនទៀត ។
ជនសង្ស័យបានសារភាពថា ឈ្មោះ ប៉ិក សែន សុវណ្ណ រូបគេបានបញ្ជាទិញគ្រឿងញៀនពីជនជាតិថៃម្នាក់ឈ្មោះ ឈីន
ដើម្បីយកទៅចែកចាយបន្ត ដោយណាត់ប្រគល់-ទទួលទំនិញនៅម្តុំស្រះស្ទួចត្រី ចំណែកឈ្មោះ ពេជ្រ រដ្ឋា រូបនាងត្រូវបានជនជាតិថៃឈ្មោះ ឈីន ប្រើឲ្យយកតែ១កញ្ចប់ធំដាក់ក្នុងកាបូបស្ពាយ ទៅប្រគល់ឲ្យជនសង្ស័យខាងលើ ហើយរូបនាងមិនដឹងថា ក្នុងកញ្ចប់នោះជាគ្រឿងញៀននោះទេ។
ចំណែកជនសង្ស័យជាជនជាតិថៃ សមត្ថកិច្ចកំពុងតែបន្តស្រាវជ្រាវចាប់ខ្លួន ដើម្បីយកមកផ្តន្ទាទោសទៅតាមច្បាប់។
បច្ចុប្បន្ន កម្លាំងជំនាញបានកសាងសំណុំរឿងបញ្ជូនជនសង្ស័យ ទៅតុលាការដើម្បីចាត់ការទៅតាមនីតិវិធីច្បាប់៕
មតិយោបល់