ភ្នំពេញ: នៅរសៀលថ្ងៃទី៦ ខែកក្កដា ឆ្នាំ២០១៦នេះ លោក លាង សំណាត់ ចៅក្រមជំនុំជម្រះនៃសាលាដំបូងរាជធានីភ្នំពេញ បានលើកយកសំណុំរឿងអតីតឧត្តមសេនីយ៍ទោយោធា មានងារឧកញ៉ា ម្នាក់ ចេញមូលប្បទានប័ត្រគ្មានសាច់ប្រាក់ (ចេញសែកស្អុយ) មកបើកសវនាការជំនុំជម្រះលើអង្គសេចក្តី។
ជនជាប់ចោទឈ្មោះ ងិន មនោ ត្រូវបានលោក ស្រី ម៉ាកនី តំណាងអយ្យការចោទប្រកាន់ពីបទ មិនបំពេញកាតព្វកិច្ចចពោះឧបករណ៍អាចជួញដូរបាន ដោយមានដើមបណ្តឹង យោងតាមមាត្រា ២៣១ នៃច្បាប់ស្តីពី ឧបករណ៍អាចជួញដូរបាន និងប្រតិបត្តិការទូទាត់សងប្រាក់។
អ្វីដែលគួរកត់សម្គាល់នោះ គឺ ជនជាប់ចោទឈ្មោះ ងិន មនោ ខណ:បញ្ជូនមកឱ្យតុលាការតាក់ទោសមិនត្រូវបានអនុរក្សពន្ធនាគារដាក់ខ្លោះដៃដូច ជនជាប់ចោទដទៃទៀតឡើយ ដោយអនុញ្ញាតឱ្យដើរក្រៅជួរដោយសេរី។
គួរបញ្ជាក់ថា សមត្តកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃ បានធ្វើការឃាត់ជនជាប់ចោទរូបនេះកាលពីថ្ងៃទី១១ ខែមេសា ឆ្នាំ២០១៦ តាមពាក្យបណ្តឹងរបស់ដើមបណ្តឹងម្នាក់មានងារជាឧកញ៉ាដែរ ពាក់ព័ន្ធករណីចេញមូលប្បទានប័ត្រគ្មានសាច់ប្រាក់ (ចេញសែកស្អុយ) ប្រមាណជា១៦ម៉ឺនដុល្លារ។
ទោះយ៉ាងណាសំណុំរឿងនេះ ត្រូវបានលោក លាង សំណាត់ លើកពេលទៅប្រកាសសាលក្រមនៅរសៀលថ្ងៃទី២៩ ខែកក្កដា ឆ្នាំ២០១៦ខាងមុខវិញ៕
មតិយោបល់