បន្ទាយមានជ័យ: ករណីគ្រោះថ្នាក់ចរាចរណ៍ រថយន្តដឹកដំឡូងមីរបស់ថៃ បើកក្នុងល្បឿនលឿន ដល់ចំណុចផ្លូវកោង បានក្រឡាប់ទ្រុងរថយន្តសង្កត់លើបុរសម្នាក់ រងរបួសធ្ងន់ ស្លាប់ពេលបញ្ជូនដល់មន្ទីរពេទ្យ។
ហេតុការណ៍នេះ កើតទ្បើងនៅវេលាម៉ោង៤ និង២០នាទីរសៀលថ្ងៃទី១៦ ខែមករា ឆ្នាំ២០១៩ នៅលើផ្លូវជាតិលេខ៥៩ ត្រង់ចំណុចភូមិកណ្តាល ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។
ជនរងគ្រោះឈ្មោះ សុង លី ភេទប្រុស អាយុ៣០ឆ្នាំ រស់នៅភូមិជ្រោងស្តៅ ក្រាំងធ្នង់ ស្រុកបាទី ខេត្តតាកែវ (ស្លាប់)។ រីឯតៃកុងរថយន្តឈ្មោះ សិត ថាផនសុរ: ភេទប្រុស អាយុ២៥ឆ្នាំ រស់នៅភូមិត្រាច ឃុំតាឃង់ ស្រុកសាំខ: ខេត្តសុរិន្ទប្រទេសថៃ។
សមត្ថកិច្ច បានឲ្យដឹងថា មុនកើតហេតុជនរងគ្រោះ បានជិះម៉ូតូទៅពិធីមង្គការបងប្អូននៅភូមិខ្លាងាប់ អូរសំព័រ ស្រុកម៉ាឡៃ ធ្វើដំណើរពីកើតទៅលិច។ មកដល់ចំណុចកើតហេតុខាងលើ ក៏បានបត់ម៉ូតូចូលលេងផ្ទះបងប្អូនសិន ស្រាប់តែមានរថយន្តធុនធំរបស់ថៃដឹកដំឡូងមី ធ្វើដំណើរក្នុងទិសដៅស្របគ្នាយ៉ាងលឿន ត្រង់ចំណុចផ្លូវកោង បណ្ដាលឲ្យក្រឡាប់ទ្រុងរថយន្ត សង្កត់ទៅលើជនរងគ្រោះ រងរបួសធ្ងន់ ក្រោយមកបានស្លាប់ពេលដឹកទៅដលើមន្ទីរពេទ្យ៕
ក្រោយកើតហេតុវត្ថុតាងម៉ូតូ និងរថយន្តយកមករក្សាទុកនៅអធិការដ្ឋាននគរបាលស្រុក ដើម្បីកសាងសំណុំរឿង ចាត់តាមនីតិវិធីច្បាប់៕
មតិយោបល់