Post News Media ព័ត៌មានជាតិ ត្រឹមតែ២ថ្ងៃ ...

ត្រឹមតែ២ថ្ងៃ អគ្គនាយកដ្ឋានកាំកុងត្រូល រកឃើញដេប៉ូប្រេងឥន្ធន:លួចបន្លំបរិមាណ​៤ទីតាំង រួមជាមួយទំនិញផ្ទុកសារធាតុគីមី និងហួសកាលប្រើប្រាស់មួយចំនួនធំ

​ភ្នំពេញ: យោងតាមផេក ក្រសួងពាណិជ្ជកម្ម បានឲ្យដឹងថា នៅក្នុងប្រតិបត្តិការចុះឃ្លាំពិនិត្យទីផ្សារ និងត្រួតពិនិត្យតាមបណ្តាស្ថានីយ/ដេប៉ូប្រេងឥន្ធន:ទូទាំងប្រទេស ចាប់ថ្ងៃទី២២ ដល់ ២៣ ខែមករា ឆ្នាំ២០១៩ មន្ត្រីអគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានរកឃើញដេប៉ូលក់ប្រេងឥន្ធន: ៤ទីតាំង​ នៅខណ្ឌ​ឫស្សីកែវ មានការលួចបន្លំបរិមាណ និងគុណភាព ដូចជា៖ ដេប៉ូ TELA ឈុន ស៊ុនហ៊ួ ឬ,​ ដេប៉ូ TELA ប៊ុត ពុទ្ធា,​ ដេប៉ូ TELA ទួលសង្កែ និងដេប៉ូ TELA ស្ថិតនៅផ្លូវលេខ៩៩ សង្កាត់ទួលសង្កែ។

មន្ត្រីជំនាញអគ្គនាយកដ្ឋានកាំកុងត្រូល បានឱ្យម្ចាស់ដេប៉ូប្រេងខាងលើ ធ្វើកិច្ចសន្យាកែតម្រូវភាពមិនអនុលោមទាំងឡាយ ហើយបញ្ឈប់សកម្មភាពនូវការក្លែងបន្លំនេះតទៅទៀត។ ក្នុងករណីមិនរាងចាល មន្ត្រីជំនាញនឹងស្នើក្រសួងពាណិជ្ជកម្ម ដកហូតអាជ្ញាបណ្ណអាជីវកម្ម និងកសាងសំណុំរឿងបញ្ជូនទៅតុលាការ។

នៅក្នុងប្រតិបត្តិការនេះដែរ មន្ត្រីសាខាកាំកុងត្រូលខេត្តព្រះសីហនុ, ខេត្តស្ទឹងត្រែង និងខេត្តព្រះវិហារ បានចុះទៅកាន់ផ្សារគោលដៅក្នុងខេត្តរបស់ខ្លួន ហើយបានរកឃើញងៀតបបែល មានផ្ទុកសារធាតុគីមីហាមឃាត់បូរ៉ាក់ (Borax) ២គីឡូក្រោម រួមជាមួយទំនិញហួសកាលប្រើប្រាស់ មានដូចជា ប័រកំប៉ុង ៨០ក្រាម, ត្រីខ ១៧០ក្រាម, ទឹកដោះគោឆៅ ៧៤០ក្រាម, ទឹកផ្លែឈើ ០,៤លីត្រ, ខ្ទិះដូងកំប៉ុង ១៦៥មីលីលីត្រ, ទឹកឃ្មុំដប ៨,១លីត្រ, ទឹកក្រូច ៥លីត្រ។ មន្ត្រីជំនាញ បានធ្វើការដកហូត និងកំទេចចោលភ្លាមៗផងដែរ។

ទន្ទឹមគ្នានេះ មន្ត្រីសាខាកាំកុងត្រូលខេត្តបន្ទាយមានជ័យ បានរកឃើញសិប្បកម្មផលិតស្ករត្នោតក្លែងក្លាយ ១កន្លែង ស្ថិតនៅភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត បានកែច្នៃចេញពីស្ករ-ស ជាមួយសារធាតុផ្សេងៗ។ មន្ត្រីជំនាញ បានស្នើព្រះរាជអាជ្ញារងអមសាលាដំបូងខេត្ត ធ្វើការផ្អាកសិប្បកម្មនោះបណ្តោះអាសន្ន រួចកសាងសំណុំរឿង ដើម្បីបញ្ជូនម្ចាស់សិប្បកម្មទៅតុលាការ៕

Loading...