ពោធិ៍សាត់: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា ក្មេងទំនើងម្នាក់ក្នុងចំណោមបក្ខពួក៥នាក់ ត្រូវបានកម្លាំងនគរបាលខេត្តពោធិ៍សាត់ ឃាត់ខ្លួនពាក់ព័ន្ធករណីហិង្សា កាលពីថ្ងៃទី២៨ ខែមករា ឆ្នាំ២០១៩ វេលាម៉ោង១នឹង៤៣នាទីយប់ នៅចំណុចភូមិអូរស្តៅ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។
លោកវរសេនីយ៍ឯក ម៉ូ លីដា ស្នងការរងខេត្តបានឱ្យដឹងថាក្រុមជនសង្ស័យមានគ្នា៥នាក់ បានធ្វើសកម្មភាពវាយទៅលើជនរងគ្រោះ។ ជនសង្ស័យឈ្មោះឡុង វណ្ណ: ភេទប្រុស អាយុ១៩ឆ្នាំ មុខរបរកម្មករ នៅភូមិកំពង់ក្របី ឃុំអន្លង់វិលស្រុកកណ្តៀង ខេត្តពោធិ៍សាត់ បក្ខពួកផ្សេងទៀតបានគេចខ្លួន។
ចំណែកជនរងគ្រោះឈ្មោះ អុន សម្ភស្ស ហៅពុយ ភេទប្រុស អាយុ១៩ឆ្នាំ ភូមិអូរស្តៅ ផ្ទះព្រៃ ក្រុងពោធិ៍សាត់ របួសធ្ងន់ សម្រាកនៅមន្ទីរពេទ្យខេត្តពោធិ៍សាត់។
លោកស្នងការរងបន្តថា ការឃាត់ខ្លួនជនសង្ស័យខាងលើដោយអនុវត្តតាមបញ្ជាលោកតន់ សីហតេជ ព្រះរាជអាជ្ញាអមសាលាដំបូងខេត្តពោធិ៍សាត់ ចាត់ការតាមច្បាប់៕
ព័ត៌មានជាតិ
មតិយោបល់