ព័ត៌មានជាតិ

ម៉ាស្តា​​ស្លាក​លេខ ​ខេមរភូមិន្ទ​01: 2-8499​ ​បោះពួយ​ជ្រុល​បុក​រះ​សំយាប​ផ្ទះ ​ប្រជាពលរដ្ឋ​បាក់​ខ្ទេច​ រួច​បើក​រត់បាត់

ភ្នំពេញ: រថយន្តស៊េរីទំនើបពាក់​​ស្លាក​លេខ​ ខ.ម​ ​បោះពួយ​យ៉ាង​លឿន​ជ្រុល​បុក​រះ​សំយ៉ាប មុខ​ផ្ទះ​ប្រជាពលរដ្ឋ​ បាក់​ខ្ទេច​អស់​​ជាង​២០ម៉ែត្រ​ រួច​បើក​រថយន្ត​យកទៅសំងំ​ទុក​ក្នុង​បុរី​ឈឹង លុះក្រោយមកទើបមានតំណាងរថយន្ត មកចរចាជាមួយម្ចាស់ផ្ទះ ដើម្បីសងការខូចខាត។

ហេតុការណ៍​នេះ ​បាន​បង្ក​ឲ្យ​មាន​ការភ្ញាក់​ផ្អើល នៅម៉ោង​ជាង​១១និង០០នាទីយប់​ថ្ងៃ​ទី​០១ ខែ​កុម្ភ: ​ឆ្នាំ​២០១៩ នៅ​ផ្លូវ​បេតុង ​ចំណុចផ្សារ​ភូមិ​សិរីយា ​ស្ថិត​ក្នុង​សង្កាត់​ឬស្សីកែវ ​ខណ្ឌ​ឬស្សីកែវ រាជធានី​ភ្នំពេញ​។

តាមប្រភពព័ត៌មានពីកន្លែងកើតហេតុ បាន​​​ឲ្យ​ដឹង​ថា ​នៅ​មុន​ពេល​កើតហេតុ​ គេ​ឃើញ​រថយន្ត​មួយ​គ្រឿង​ម៉ាក ​Mazda BT50 ពណ៌​ស ​ពាក់​ស្លាក​លេខ​ខេមរភូមិន្ទ​ 01: 2-8499 បើក​បរ​ដោយ​បុរស​ម្នាក់​ ក្នុង​ល្បឿន​លឿន​ដូច​ហោះ​ ដោយ​ធ្វើ​ដំណើរ​តាម​ផ្លូវ​បេតុង ​ក្នុង​ទិស​ដៅ​ពី​លិច​ទៅ​កើត ​លុះ​មក​ដល់​ចំណុច​កើត​ហេតុ ​ស្រាប់​តែ​រថយន្ត​បាន​រេ​ចង្កូត​ទៅ​ស្ដាំ​ជ្រុល​ទៅ​បុក​រះ​បង្គោល​សំយាបមុខ​ផ្ទះ​ប្រជាពលរដ្ឋ ​បណ្ដាល​ឲ្យ​បាក់​ខ្ទេច​អស់​ប្រវែង​ជាង​២០ម៉ែត្រ ​រង​ការ​ខូចខាត​យ៉ាង​ដំណំ​។

ភ្លាមៗ​នោះ​រថយន្ត​បង្ក​ ​មិន​បាន​ឈប់​ដោះស្រាយ​នោះ​ទេ ​ថែម​ទាំង​បើក​រត់​គេច​ចូល​ទៅ​សំងំ​ក្នុង​បុរី​មួយ​កន្លែងឈឹង​តែ​ម្ដង​។

ក្រោយ​ពេលកើត​ហេតុ ​ក៏​មាន​ខាងតំណាង​រថយន្ត​បង្ក ​បាន​ចុះ​មក​ចរចា​គ្នា​​ជាមួយ​នឹង​ម្ចាស់​ផ្ទះ ​ដែល​រង​ការ​ខូចខាត ដោយ​សុំ​ធ្វើ​សំយាប​ផ្ទះ​ថ្មី​ឲ្យ​វិញ​ ​ដើម្បី​បញ្ចប់​រឿង​នៅ​នឹង​កន្លែង​តែ​ម្តង​​៕

មតិយោបល់