Post News Media ព័ត៌មានជាតិ ស្រទ្បាំងកាំង...

ស្រទ្បាំងកាំងហ្មង! គេនាំគ្នាផ្អើល អគ្គិភ័យឆេះរោងចក្រផលិតស្បែកជើង និងគ្រឿងបន្សំស្បែកជើង ម៉ារូ ឈុន រថយន្តពន្លត់អគ្គិភ័យសមត្ថកិច្ច ស្ទុះស្ទាចូលកន្លែងកើតហេតុ តែត្រូវតំណាង​រោងចក្រ​បិទទ្វារមិន​ឲ្យចូល

ភ្នំពេញ: កាលពី​វេលា​ម៉ោង​៣​ និង​៣៥​នាទី​ទៀប​ភ្លឺ​ថ្ងៃ​ទី​៦ ខែកុម្ភ: ឆ្នាំ​២០១៩ មានអគ្គិភ័យ​ឆេះ​ឃ្លាំង​ក្នុង​រោងចក្រ​ផលិត​ស្បែកជើង និង​គ្រឿង​បន្សំ​ស្បែកជើងមួយកន្លែង នៅ​ជិត​ផ្សារ​ទួល​ពង្រ ស្ថិត​នៅ​ភូមិ​ត្រពាំង​រំចេក សង្កាត់​ចោម​ចៅ​ទី​១ ខណ្ឌ​ពោធិ៍​សែន​ជ័យ។

ភ្លាមៗផងដែរ​សមត្ថកិច្ច​ បានហៅ​រថយន្ត​ពន្លត់អគ្គិភ័យ​មក​ធ្វើការ​បាញ់​ពន្លត់​ តែ​ត្រូវ​តំណាង​រោងចក្រ​មិន​ឲ្យរថយន្ត​ពន្លត់អគ្គិភ័យ​ចូល​កន្លែង​កើតហេតុ ទើប​បង្ក​ឲ្យមានការ​ភ្ញាក់ផ្អើល​ដល់​អ្នក​​ប្រជាពលរដ្ឋ​នៅទីនោះ។

សមត្ថកិច្ច​បានឲ្យ​ដឹង​ថា អគ្គិភ័យ​នេះ បាន​ឆាបឆេះ​នៅឃ្លាំង​ស្តុក​ស្បែកជើង និង​កម្ទេច​កា​តុង ​ក្នុង​រោងចក្រផលិតស្បែកជើង និងគ្រឿងបន្សំស្បែកជើង ម៉ារូ ឈុន ​ខប..អិលធីឌី ដែល​ជាប់​របង​ផ្ទះ​ជួលប្រជាពលរដ្ឋ។

ខណ:នោះលោក​អធិការរង​ខណ្ឌ​ពោធិ៍​សែន​ជ័យ ​បាន​ទាក់ទង​ទៅ​លោក​អភិបាល​ខណ្ឌ និង​លោក​អធិការ​ ដើម្បី​សុំ​គោលការណ៍​ចាត់វិធានការ និង​បញ្ជា​កម្លាំង​នគរបាល​ប៉ុស្តិ៍​ ធ្វើការវាយ​សោ​ទ្វារ​រោងចក្រ​ឲ្យ​រថយន្ត​ចូល​ពន្លត់​ភ្លាម​ៗ​ផងដែរ។

ករណីនេះ រថយន្ត​ពន្លត់អគ្គិភ័យ​របស់​សាលា​រាជធានី​ភ្នំពេញ ​បាន​មក​ធ្វើការ​បាញ់​ទឹក​ពន្លត់​ចំនួន​៩​គ្រឿង​ តែ​ប្រើប្រាស់​ទឹក​អស់​ចំនួន​៨​ គ្រឿងប៉ុណ្ណោះ

ពាក់ព័ន្ធនឹងបញ្ហានេះ ​ខាង​ជំនាញ​ផ្នែក​ពន្លត់​អគ្គិភ័យ​បាន​បញ្ជាក់​ថា ក្នុង​ព្រឹក​ថ្ងៃ​ដដែល នឹង​ហៅ​តំណាង​រោងចក្រ​ខាងលើ ដើម្បី​យក​ទៅ​ធ្វើការ​ណែនាំ​ផង​ដែរ​។

មូលហេតុ​មានអគ្គិភ័យ​នេះទ្បើង សមត្ថកិច្ច​មិន​ទាន់អាចសន្និដ្ឋានបានឡើយ​ គ្រាន់តែ​ដឹង​ថា ​នៅ​ក្នុង​ឃ្លាំង​ដែល​ស្តុក​ស្បែកជើង និង​កម្ទេច​កា​តុង​នោះ ​មិន​មាន​ខ្សែភ្លើង​នោះ​ឡើយ​៕