Post News Media ព័ត៌មានជាតិ អ្នកណាមិនភ័យប...

អ្នកណាមិនភ័យបើលឺ​សំឡេង​កូន​យំ​ពេញ​ផ្ទះ​ ពេលសមត្ថកិច្ច​មក​ដល់​ប្តី​របួស​ ចំណែកប្រពន្ធ​ដេក​ស្តូក​

ភ្នំពេញ: ទំនាស់រវាងប្តី​និងប្រពន្ធ​មួយគូ​រ​រហូត​ដល់​បោក​រូបថត​អាពាហ៍ពិពាហ៍ និង​ទូរស័ព្ទ ឈាន​ដល់​ប្រើ​អំពើ​ហិង្សា​ទៅ​វិញ​ទៅ​មក​យ៉ាងធ្ងន់ធ្ងរ បណ្តាល​ប្តី​ឱ្យ​របួស​ពេញ​ខ្លួន រីឯ​ប្រពន្ធ​សន្លប់​នៅ​លើ​ពូក បង្ក​ឲ្យភ្ញាក់ផ្អើល​កាលពី​វេលាម៉ោង​៨​យប់ ថ្ងៃ​ទី​១៤ ខែកុម្ភ: ឆ្នាំ​២០១៩ ស្ថិត​នៅ​ភូមិ​ថ្មគោល សង្កាត់​ចោម​ចៅ​ទី​២ ខណ្ឌ​ពោធិ៍​សែន​ជ័យ​ រាជធានីភ្នំពេញ ។

បុរស​ជា​ប្តី​មានឈ្មោះ ផា​ន់ វន ភេទ​ប្រុស អាយុ​៤០​ឆ្នាំ មុខរបរ​រត់​តាក់ស៊ី រស់នៅ​ផ្ទះ​កើតហេតុ​ខាងលើ ចំណែកជន​រង​គ្រោះជា​ប្រពន្ធមាន​ឈ្មោះ យ៉ា​ន់ វី ហៅ​លី​ន អាយុ​២៩​ឆ្នាំ មុខរបរ​មើល​ការ​ខុស​ត្រូវ​ទូរ​ហ្គេ​ម​បាញ់​ត្រី នៅ​ម្តុំ​សាលា​អនុ​វិទ្យាល័យ​គោ​គ​បញ្ជាន់ រស់នៅ​ជាមួយ​គ្នា​ភូមិ​កើតហេតុ​ខាងលើ​។

តាម​ប្រភព​ពី​ប្រជាពលរដ្ឋ​នៅ​កន្លែង​កើតហេតុ​ឱ្យ​ដឹង​ថា នៅ​មុន​កើតហេតុ ដោយ​លឺ​សំឡេង​គ្រួសារ​ខាង​លើ​មាន​ជម្លោះ​នៅ​ក្នុង​គ្រួសារ រហូត​បោក​របស់របរ​ក្នុងផ្ទះ ហើយ​លឺ​សំឡេង​កូន​យំ​ពេញ​ផ្ទះ បន្ទាប់​មក​កូនប្រុស​របស់​ពួក​គាត់​បាន​ចេញ​មក​ពី​ក្នុងផ្ទះ ហើយ​ប្រាប់​ថា ពុក​ម្តាយ​គាត់​វាយ​គ្នា​ទៅ​វិញ​ទៅ​មក ពេលនោះ​ប្រជាពលរដ្ឋ​ក្នុងភូមិ​បាន​ទូរស័ព្ទ​ប្តឹង​សមត្ថកិច្ច​ឲ្យមក​ជួយ​អន្តរាគមន៍​ភ្លាម​ៗ​ផង​ដែរ ។

ប្រភព​ពី​សមត្ថកិច្ច​ឱ្យ​ដឹង​ថា ខណ:​ប្រជាពលរដ្ឋ​ទូរស័ព្ទ​ប្តឹង​ភ្លាម​ៗ កម្លាំង​នគរបាល​ប៉ុស្តិ៍​ចុះ​ទៅ​ដល់​កន្លែង​កើតហេតុ ហើយ​ឃើញ​ប្តី​មាន​របួស​ស្នាម​ក្រចក​ពេញ​ខ្លួន តែ​មិនឃើញ​ប្រពន្ធ ​ពេល​នោះ​ដែរ សមត្ថ​កិច្ច​បាន​ស្រែកហៅ​ប្រពន្ធ តែ​មិន​លឺ​សំឡេង​ឆ្លើយ​តប ហើយ​សមត្ថកិច្ច​មានការ​សង្ស័យ​បាន​ឡើង​ទៅ​លើ​ឡៅតឿ​ឃើញ​ស្ត្រី​ជា​ប្រពន្ធ​ដេក​ស្ដូកស្ដឹង​ដកដង្ហើម​ឡើង​ញាប់​នៅ​លើ​ពូក ក៏​ហៅ​ប្រជាពលរដ្ឋ​ឱ្យ​ជួយ​ធ្វើ​ចលនា​ដង្ហើម និង​បញ្ជូន​ទៅ​មន្ទីរពេទ្យ​ឯកជន​ភ្លាម​ៗ​ផង​ដែរ និង​ឃាត់​បុរស​ជា​ប្តី​យក​ទៅ​សាកសួរ​នៅ​ប៉ុស្តិ៍​នគរបាល​រដ្ឋបាល​ចោម​ចៅ​ទី​២​តែម្តង។

​ប្រភព​ពី​បុរស​ជា​ប្តី​ខាងលើ​សារភាព​ប្រាប់​សមត្ថកិច្ច​ថា នៅ​មុន​កើតហេតុ រូប​គាត់​មិនសូវ​ស្រួលខ្លួន​ផង ណាមួយ​មិន​ពេញចិត្ត​ការងារ​ប្រពន្ធ​បាន​ទូរស័ព្ទ​ទៅ​ប្រពន្ធ​គាត់​ជា​ច្រើន​ដង​នៅ​កន្លែងធ្វើការ​ទូ​ហ្គេ​ម​បាញ់​ត្រី តែ​ប្រពន្ធ​គាត់​មិន​ព្រម​ទទួល ហើយ​ពេល​ទទួល​ទូរស័ព្ទ​បាន​ជេរ​ប្រមាថ គាត់​យ៉ាង​ខ្លាំង​ធ្វើ​ឲ្យ​គាត់​ទ្រាំ​មិន​បាន​ក៏​ទៅ​រករឿង​នៅ​កន្លែងធ្វើការ​តែ​ម្ដង រួច​បាន​ឈ្លោះប្រកែក​គ្នា លុះ​នាំ​គ្នា​មក​ដល់​ផ្ទះ​វិញ​ប្រពន្ធ​គាត់​បោក​រូបថត​អាពាហ៍ពិពាហ៍​ចោល ហើយ​ប្តី​ក៏​បោក​ទូរស័ព្ទ​ប្រពន្ធ​ចោល​វិញ​ដែរ និង​បាន​វាយ​គ្នា​ទៅ​វិញ​ទៅ​មក ។ ក្រោយ​ប្តី​ចាប់​បោច​សក់​ប្រពន្ធ​សង្កត់​លើ​ពូក ចំណែក​ប្រពន្ធ​ខាំ​នឹង​ក្រញៅ​ពេញ​ខ្លួន​ប្តី អ្នក​ទាំង​ពីរ​រង​របួស​រៀងខ្លួន​ដោយ​ប្រពន្ធ​ថប់ដង្ហើម​ជិត​សន្លប់​ទើប​សមត្ថកិច្ច​ពឹង​អ្នក​ជិតខាង​ឲ្យយក​ទៅ​មន្ទីរពេទ្យ​ឯកជន​ជិត​កន្លែង​កើតហេតុ​ភ្លាម​ៗ​ផង​ដែរ​។

ក្រោយ​ពេល​កើតហេតុ ស្ត្រី​រង​គ្រោះជា​ប្រពន្ធ​មិន​ប្តឹងប្តល់​ទៅ​លើ​ប្តី​របស់​ខ្លួន​ឡើយ ដោយ​ឱ្យ​សមត្ថកិច្ច​ធ្វើ​កិច្ចសន្យា និង​ឱ្យ​ត្រឡប់​ទៅ​ផ្ទះ​វិញ​ភ្លាម​ៗ​ តែ​ប្តី​សុំ​សំណូមពរ​ប្រពន្ធ​របស់​គាត់​កុំទៅ​ធ្វើ​ការងារ​កន្លែង​ទូរ​ហ្គេ​ម​បាញ់​ត្រី​ទៀត ព្រោះ​មិនមែន​ការងារ​ល្អ​នោះ​ឡើយ ៕