ភ្នំពេញៈ កាលពីវេលាម៉ោង ១២និង៣៤នាទីរំលងអធ្រាត្រ ឈានចូលថ្ងៃតី២៧ ខែកុម្ភៈ ឆ្នាំ២០១៩ មានករណីរថយន្តដឹកទំនិញធុនធំមួយគ្រឿង បើកបុកចូលផ្ទះប្រជាពលរដ្ឋ បង្កឲ្យមានការភ្ញាក់ផ្អើល តែមិនមានគ្រោះថ្នាក់ដល់ម្ចាស់ផ្ទះទេ នៅចំណុចស្តុបចំការដូង (ផ្លូវចូលសាលាកសិកម្ម) ក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
រថយន្តបង្កម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខតាកែវ 3A-1959 មានបិទស្លាកសញ្ញា «កងដឹកជញ្ជូន(ឆ.ន)» នៅពីចំហៀងកាប៊ីនរថយន្ត (អ្នកបើកបរមិនស្គាល់អត្តសញ្ញាណ) ។ ម្ចាស់ផ្ទះរងគ្រោះមានឈ្មោះ ប៉ែន សុខលី ភេទប្រុស អាយុ៣៧ឆ្នាំ មុខរបរជាងកាត់សក់ មានទីលំនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
ក្រោយកើតហេតុ សមត្ថកិច្ច បានចុះទៅដល់កន្លែងកើតហេតុ ប៉ុន្តែមិនជួយអន្តរាគមន៍អ្វីទេ ដោយសារភាគីម្ចាស់ផ្ទះមិនសហការជាមួយសមត្ថកិច្ច៕
មតិយោបល់