ភ្នំពេញៈ បុរសម្នាក់ស្រវឹងធ្លាក់ភ្នែក បានបើករថយន្តកូរ៉ូឡាមួយគ្រឿងបោះពួយយ៉ាងលឿន ទៅបុកក្បាលព្រួញពុះចែកទ្រូងផ្លូវ បណ្តាលឲ្យរថយន្តរងការខូចខាត ចំណែកអ្នកបើកគេចខ្លួនបាត់ស្រមោល។
ហេតុការណ៍នេះ កើតទ្បើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២៧ ខែកុម្ភៈ ឆ្នាំ២០១៩ ត្រង់ចំណុចស្តុបជាប់ខាងត្បូងកងរាជអាវុធហត្ថលើផ្ទៃប្រទេស ស្ថិតតាមបណ្តោយផ្លូវ២៨៩ ក្នុងសង្កាត់បឹងកក់ទី១ ខណ្ឌទួលគោក។
តាមប្រភពព័ត៌មានពីកន្លែង បានឲ្យដឹងថា នៅមុនពេលកើតហេតុ គេឃើញបុរសម្នាក់ បានបើករថយន្តមួយគ្រឿង ម៉ាកកូរ៉ូឡា ៩៥ ពណ៌ស ពាក់ស្លាកលេខ ភ្នំពេញ2E-2255 ដោយអ្នកបើកបរស្ថិតក្នុងស្ថានភាពស្រវឹងជោកជាំ បានធ្វើដំណើរតាមបណ្តោយផ្លូវ២៨៩ ពីជើងទៅត្បូង និងក្នុងល្បឿនយ៉ាងលឿន។
មកដល់ចំណុចកើតហេតុ ស្រាប់តែរថយន្តខាងលើ បានរេចង្កូតជ្រុលទៅបុកនិងក្បាលព្រួញពុះចែកទ្រូងផ្លូវ ចំពាក់កណ្តាលពេញទំហឹងបណ្តាលឲ្យក្បាលព្រួញពុះចែកទ្រូងផ្លូវ រងការខូចខាតបែកបាក់បន្តិចបន្តួច។ ចំណែករថយន្តបង្ករងការខូចខាតក្រពឹតផ្នែកខាងមុខយ៉ាងដំណំទៅមុខលែងរួច ដោយឡែកអ្នកបើកបរ បានចុះរត់គេចខ្លួនចេញពីកន្លែងកើតហេតុបាត់ស្រមោល សន្សល់ទុកតែរថយន្ត នៅនិងកន្លែងកើតហេតុ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ហើយទាក់ទងជំនាញឲ្យចុះមកធ្វើការវាស់វែង និងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់៕
មតិយោបល់