ព្រះសីហនុ: នៅវេលាម៉ោង ១២ និង១០នាទីរំលងអធ្រាត្រឈានចូល ថ្ងៃទី១ ខែមីនា ឆ្នាំ២០១៩ មានគ្រោះថ្នាក់ចរាចរណ៍ រថយន្តមួយគ្រឿង បើករេចង្កូតបុកចូលតូបលក់ឥវ៉ាន់របស់ប្រជាពលរដ្ឋ បណ្ដាលឲ្យក្រទ្បាប់ របួសមនុស្ស ៤នាក់ នៅលើផ្លូវជាតិលេខ៤ ចន្លោះគីឡូម៉ែត្រ១៩៩-២០០ ស្ថិតនៅភូមិអូរតាសេក ឃុំអូរឧកញ្ញាហេង ស្រុកព្រៃនប់ ខេត្តព្រះសីហនុ។
រថយន្តបង្ក ម៉ាកលុចស៊ីស RX300 មួយគ្រឿង ពណ៌ស ពាក់ស្លាកលេខ កំពត 2B-5007 ធ្វើដំណើរពីខេត្តព្រះសីហនុ ទៅភ្នំពេញ បើកបរដោយឈ្មោះ ឆឹង ពៅ ភេទប្រុស អាយុ ៣៧ឆ្នាំ មុខរបរ បើកបររថយន្ត មានទីលំនៅភូមិស្ថោតូច ឃុំអង្គរមាស ស្រុកដងទង់ ខេត្តកំពត មានអ្នករួមដំណើរ ០៣ នាក់។ មកដល់ចំណុចខាងលើ ក៏បានរេចង្កូត ធ្លាក់ផ្លូវមកខាងស្ដាំដៃ ក៏បុកតូបលក់ឥវ៉ាន់របស់ប្រជាពលរដ្ឋ បណ្ដាលឲ្យរថយន្តក្រឡាប់តែម្ដង។
ជនរងគ្រោះទាំង៤នាក់៖
១.ឈ្មោះ ឆឹង ពៅ ភេទប្រុស អ្នកបើករបរថយន្ត រងបួសស្រាល
២.ឈ្មោះ ជួន រៀន ភេទប្រុស អ្នករួមដំណើរ របួសស្រាល
៣.ឈ្មោះ គិត ភក្ដី ភេទប្រុស អ្នករួមដំណើរ របួសស្រាល
និង៤.ឈ្មោះ រដ្ឋ វីរ: ភេទប្រុស អ្នករួមដំណើរ របួសស្រាល ។
ក្រោយកើតហេតុជនរងគ្រោះ ត្រូវបានបញ្ជូនទៅព្យាបាលនៅមន្ទីរពេទ្យ ឯកជនមួយឈ្មោះ អមរា ស្ថិតនៅភូមិបត់គគីរ ឃុំបិតត្រាំង៕
មតិយោបល់