ភ្នំពេញ: ជនជាតិចិនម្នាក់ បានបើករថយន្តឆ្លងផ្លូវ មិនប្រយ័ត្នត្រូវម៉ូតូមួយគ្រឿងបើកលឿនបុករងរបួសធ្ងន់២នាក់ កាលពីវេលាម៉ោង ៣ និង២៥នាទីទៀបភ្លឺ ឈានចូលថ្ងៃទី២៨ ខែកុម្ភ: ឆ្នាំ២០១៩ នៅតាមបណ្ដោយផ្លូវសហព័ន្ធរុស្ស៊ី ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
រថយន្តបង្កម៉ាក RANGE ROVER ពណ៌ខ្មៅ ពាក់ស្លាកលេខ ភ្នំពេញ 2V-1123 បើកឆ្លងផ្លូវធ្វើដំណើរពីជើងទៅត្បូង បើកបរដោយជនជាតិចិន។ ចំណែកម៉ូតូរងគ្រោះម៉ាក ស្គូពី ពណ៌ក្រហម ពាក់ស្លាកលេខ ភ្នំពេញ 1AE -6588 ជិះគ្នា២នាក់ ធ្វើដំណើរពីកើតទៅលិច។
តាមប្រភពព័ត៌មានពីកន្លែងកើតហេតុ បាននិយាយថា នៅមុនពេលកើតហេតុគេឃើញ រថយន្តជនជាតិចិនខាងលើ បានចតតាមបណ្តោយផ្លូវសហព័ន្ធរុស្ស៊ី ហើយបន្ទាប់មកក៏បានរយ៉ែចេញ ក្នុងទិសដៅពីត្បូងទៅជើង ខណ:នោះដែលស្រាប់ តែមានម៉ូតូជនរងគ្រោះ បើកបរក្នុងល្បឿនយ៉ាងលឿនទិសដៅពីកើតទៅលិច ជាន់ហ្វ្រាំងមិនជាប់ បានបុករថយន្តពេញទំហឹង បណ្ដាលឱ្យជនរងគ្រោះ រងរបួសធ្ងន់ទាំង២នាក់ ចំណែកឯម៉ូតូរងការខូចខាតយ៉ាងធ្ងន់ធ្ងរផងដែរ។
ក្រោយកើតហេតុជនរងគ្រោះ ត្រូវបានរថយន្តសាមុយដឹកយកទៅសង្គ្រោះភ្លាមៗផងដែរ ហើយជំនាញចរាចររាជធានីភ្នំពេញ បានធ្វើការវាស់វែង និងយករថយន្តព្រមទាំងម៉ូតូជនរងគ្រោះ ទៅរក្សាទុកដើម្បីរង់ចាំការដោះស្រាយ៕
មតិយោបល់