ភ្នំពេញៈ យុវតីរូបស្រស់ម្នាក់ ទំនងម្ដាយបង្ខំចិត្តឲ្យរៀបការ បានរត់គេចខ្លួមទៅស្នាក់នៅវិទ្យុ ABC ធ្វើឲ្យម្ដាយ និងបងប្អូនភ័យខ្លាចបាត់ខ្លួន បានមកពឹងពាក់ឲ្យអ្នកសារព័ត៌មាន ជាច្រើននាក់ ជួយផ្សព្វផ្សាយស្វែងរក កាលពីវេលាម៉ោង៩យប់ ថ្ងៃទី៣ ខែមីនា ឆ្នាំ២០១៩ ស្ថិតនៅផ្ទះជួលមួយកន្លែង ខាងក្រោយរបងកាណាឌីយ៉ា ផ្លូវវេងស្រេង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

យុវតីគេចខ្លួនខាងលើ មានឈ្មោះ អ៊ាង ស្រីមុំ អាយុ១៧ឆ្នាំ មុខរបប លក់គ្រឿងក្រអូប នៅផ្សារបឹងត្របែកផ្លាហ្សា ខណ្ឌចំការមន ស្នាក់នៅកន្លែងធ្វើការ។ រីឯម្ដាយ មានឈ្មោះ ប្រាជ្ញ សារ៉ាន់ ភេទស្រី អាយុ៤៩ឆ្នាំ មានស្រុកកំណើតនៅភូមិតាពេចខាងជើង ឃុំរក្សជ័យ ស្រុកបាភ្នំ ខេត្តព្រៃវែង ។

បើតាមសម្ដីស្ត្រីជាម្ដាយ បានប្រាប់ឲ្យដឹងថា យុវតីរូបនេះ នៅសល់តែ១១ថ្ងៃទៀតទេ គឺថ្ងៃទី១១ ខែមីនា ឆ្នាំ២០១៩ នឹងត្រូវរៀបការ តែមិនដឹងមានបញ្ហាអ្វី ស្រាប់តែបាត់ខ្លួន១ថ្ងៃ មិនដឹងដំណឹងសោះ ធ្វើឲ្យរូបគាត់ជាម្ដាយ មានការព្រួយបារម្មណ៍ជាខ្លាំង និងបានទាក់ទងបងប្អូន ក្រុមអ្នកសារព័ត៌មានជួយផ្សព្វផ្សាយស្វែងរក នៅវេលាម៉ោង៩យប់ថ្ងៃកើតហេតុខាងលើ ។

លុះក្រោយមក រំលងបានប្រហែលជាង២ម៉ោង ស្រាប់តែឮដំណឹងពីវិទ្យុ ABC ថា យុវតីខាងលើ បានគេចខ្លួនពីម្ដាយ និងសុំទៅស្នាក់នៅបណ្ដោះអាសន្ន ទើបធ្វើឲ្យស្ត្រីជាម្ដាយធ្វើដំណើរស្កាត់ទៅជួបកូនស្រី ។
យ៉ាងណាមិញមិនទាន់ដឹងថា យុវតីខាងលើ មានបញ្ហាអ្វីឲ្យពិតប្រាកដនោះទេ ព្រោះពេលម្ដាយទៅជួប បែរជាមិនជួបម្ដាយទេ ថែមទាំងផ្ដាំផ្ញើឲ្យម្ដាយ និងបងប្អូនត្រឡប់ទៅផ្ទះវិញ ។ ចុងក្រោយ យុវតីខាងលើ បានស្នាក់នៅក្នុងស្ថានីយ៍វិទ្យុABC ឯម្ដាយនិងបងប្អូនបានត្រឹមត្រឡប់ទៅផ្ទះវិញ រង់ចាំដោយស្រាយបញ្ហានេះនៅពេលក្រោយ ៕