សៀមរាប: ផ្ទះប្រជាពលរដ្ឋចំនួន០២ខ្នងសាងសង់ពីឈើ និងផ្ទះសាសង់ពីថ្ម ត្រូវអគ្គិភ័យឆាបឆេះយ៉ាងសន្ធោសន្ធៅ ស្ថិតនៅក្នុងភូមិតាវៀន សង្កាត់សាលាកម្រើក ក្រុងសៀមរាប កាលពីព្រឹកមិញ ថ្ងៃទី១១ ខែកក្កដា ឆ្នាំ២០១៦នេះ។
បើតាមការឲ្យដឹងពីលោកអនុសេនីយ៍ឯក ពេជ្រ សាមោល នាយប៉ុស្តិ៍នគរបាល សង្កាត់សាលាកម្រើកបានឲ្យដឹងថា ករណីខាងលើនេះ បណ្ដាលមកពីទុស្សេខ្សែភ្លើងនៅផ្ទះឈ្មោះ ម៉េង សៀង ភេទប្រុស អាយុ៣៦ឆ្នាំ ដែលមានមុខរបរជាជាងជួសជុលទូរទឹកកក និងម៉ាស៊ីនត្រជាក់ ជាផ្ទះតៀមធ្វើអំពីថ្ម ប្រក់ស័ង្កសី មានទំហំ ៤គុណ៦ម៉ែត្រ ហើយបានបន្តឆេះរាលដាលដល់ផ្ទះមួយខ្នងទៀតដែលនៅក្បែរ នោះធ្វើអំពីថ្មក្រោម ឈើលើប្រក់ស័ង្កសី មានទំហំ៤គុណ៦ម៉ែត្រ ម្ចាស់ផ្ទះ ឈ្មោះ ចាន់ ថុន ហៅយួន ភេទប្រុសអាយុ៤៨ឆ្នាំ ឆេះឈើលើទាំងស្រុង។
លោក បានបន្តថា ក្រោយពីទទួលបានព័ត៌មានខាងលើនេះ ភ្លាមកម្លាំងសមត្ថកិច្ចនគរបាលក្រុងសៀមរាប និងកម្លាំងការិយាល័យនគរបាលពន្លត់អគ្គិភ័យនៃស្នងការដ្ឋាននគរបាលខេត្តរួមទាំងបងប្អូនប្រជាពលរដ្ឋ និងកម្លាំងកងរាជអាវុធហត្ថផងដែរ បានជួយធ្វើអន្តរាគមន៍បាញ់ទឹកពន្លត់ផងដែរ តែដោយស្ថានភាពផ្លូវតូចចង្អៀតទើបកម្លាំងសមត្ថកិច្ចនគរបាលយើងមិនអាចចូលឡានទៅដល់ក្បែរនោះ ដើម្បីជួយពន្លត់ឲ្យបានទាន់ពេល នៅម៉ោង៨និង៥០នាទី ហើយពុំបណ្ដាលឲ្យនរណាម្នាក់រងគ្រោះ ក្នុងករណីនេះទេ។
លោកបន្តថា ទំហំនៃការខូចខាងកម្លាំងសមត្ថកិច្ចយើងមិនទាន់បានដឹងនៅឡើយទេ ការបាញ់ទឹកពន្លត់នេះ កម្លាំងសមត្ថកិច្ចនគរបាលយើងប្រើប្រាស់ឡានទឹកបាញ់អស់ចំនួន០៤ឡាន៕
មតិយោបល់