Post News Media ព័ត៌មានជាតិ ក្មេង​ស្ទាវ​៦...

ក្មេង​ស្ទាវ​៦​នាក់​ ជា​មុខសញ្ញា​ជិះ​ម៉ូតូ​ដេញ​វាយ​ប្លន់​យក​ម៉ូតូ​ នៅក្រុងតាខ្មៅ ត្រូវសមត្ថកិច្ចឃាត់ខ្លួន

កណ្ដាល:​ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នគរបាល​ការិយាល័យ​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​ខេត្ដកណ្ដាល​ បាន​ធ្វើការ​ឃាត់ខ្លួន​ក្រុម​ក្មេង​ស្ទាវ​៦​នាក់​ជា​មុខសញ្ញា​ជិះ​ម៉ូតូ​ដេញ​វាយ​គប់​ និង​ប្លន់​យក​ម៉ូតូ​យ៉ាង​សកម្ម​នា​ពេល​យប់​ ខណ:​ដែល​នគរបាល​ធ្វើការ​ចុះ​ល្បាត​ក្នុងភូមិ​សាស្ដ្រ​ក្រុង​តា​ខ្មៅ​ ។​ ករណី​ខាងលើ​នេះ​ធ្វើ​ឡើង​នៅ​វេលា​ម៉ោង​១​និង​២០​នាទី​ រំលង​អ​ធ្រា​ត្រ​ថ្ងៃ​ទី​៥​ ខែមេសា​ ឆ្នាំ​២០១៩​ ត្រង់​ចំណុច​រង្វង់​មូល​តា​ខ្មៅ​ (​លោកតា​ម៉ៅ​)​ ទល់មុខ​សាលាដំបូង​ខេត្តកណ្តាល​ ស្ថិត​ក្នុងភូមិ​តា​ខ្មៅ​ សង្កាត់​តា​ខ្មៅ​ ក្រុង​តា​ខ្មៅ​ ។​

​មន្ដ្រី​នគរបាល​ការិយាល័យ​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​ខេត្ដកណ្ដាល​ បាន​ឲ្យ​ដឹង​ថា​ ក្រុម​ក្មេង​ស្ទាវ​ដែល​ធ្វើការ​ឃាត់ខ្លួន​មាន​គ្នា​៦​នាក់​ ទី​១.​ឈ្មោះ​ ផ​ន​ ឆៃ​រ៉ាត់​ ភេទ​ប្រុស​ អាយុ​២៧​ឆ្នាំ​ មុខរបរ​ ជាងដែក​ ទី​២.​ឈ្មោះ​ ហៀ​ង​ មនោ​ ភេទ​ប្រុស​ អាយុ​១៩​ឆ្នាំ​ មុខរបរ​រត់​តុ​ការ​ ។​ ជនសង្ស័យ​ទី​១​និង​ទី​២​មាន​ទីលំនៅ​ភូមិ​ក្របៅ​ សង្កាត់​កំពង់​សំណាញ់​ ក្រុង​តា​ខ្មៅ​ ខេត្តកណ្តាល​ ។​ ទី​៣.​ឈ្មោះ​ អន​ ដេ​វីត​ ភេទ​ប្រុស​ អាយុ​១៨​ឆ្នាំ​ មុខរបរ​រត់​តុ​ការ​ ទី​៤.​ឈ្មោះ​ វណ្ណ​ ឌី​ ភេទ​ប្រុស​ អាយុ​១៩​ឆ្នាំ​ មុខរបរ​ជាង​ផ្សារ​ ទី​៥.​ឈ្មោះ​ ម៉ាក​ វិ​ដ​ន​ ភេទ​ប្រុស​ អាយុ​ ១៩​ឆ្នាំ​ មុខរបរ​ រត់​តុ​ការ​ ។​ ជនសង្ស័យ​ទី​៣​ ទី​៤​និង​ទី​៥​ មាន​ទីលំនៅ​ភូមិ​ព្រែក​រាំង​ សង្កាត់​កំពង់​សំណាញ់​ ក្រុង​តា​ខ្មៅ​ ខេត្តកណ្តាល​។​ និង​ទី​៦.​ឈ្មោះ​ ផាង​ ប៊ុ​ណ្ណា​ ភេទ​ប្រុស​ អាយុ​១៩​ឆ្នាំ​ មុខរបរ​ រត់​តុ​ការ​ មាន​ទីលំនៅ​ភូមិ​តា​ក្តុល​ សង្កាត់​តា​ក្តុល​ ក្រុង​តា​ខ្មៅ​ ខេត្តកណ្តាល​ ។​ ចំណែក​ម៉ូតូ​ដែល​សមត្ថកិច្ច​ដកហូត​បាន​មាន​ចំនួន​៣​គ្រឿង​ ១.​ម៉ូតូ​ម៉ាក​សេ​ហុងដា​ឌ្រី​ម​ ធុន​១២៥​ ពណ៌​ទឹកមាស​ ផលិត​ឆ្នាំ​២០១៧​ ឡើង​ស៊េរី​២០១៩​ គ្មាន​ស្លាក​លេខ​ ,២.​ម៉ូតូ​ម៉ាក​ស៊ុ​យ​ហ្ស៊ូ​គី​ឡែ​ត​ ពណ៌​សលាយ​ផ្កាឈូក​ ពាក់​ស្លាក​លេខ​ កណ្តាល​ 1V-5277​ និង​៣.​ម៉ូតូ​ម៉ាក​សេ​ហុងដា​ឌ្រី​ម​ ធុន​សេ​១២៥​ ស៊េរី​ឆ្នាំ​២០១៦​ ឡើង​ស៊េរី​ ២០១៨​ ពណ៌​ខ្មៅ​ ពាក់​ស្លាក​លេខ​កណ្តាល​ 1T-5932​ ។​

​ប្រភព​ដដែល​បន្ដ​ថា​ មុន​នឹង​ឈាន​ធ្វើការ​ឃាត់ខ្លួន​ក្រុម​ក្មេង​ស្ទាវ​៦​នាក់​ខាងលើ​ កម្លាំង​នគរបាល​ព្រហ្មទណ្ឌ​កម្រិត​ស្រាល​ បាន​ធ្វើការ​ចុះ​ល្បាត​ក្នុងភូមិ​សាស្ដ្រ​ក្រុង​តា​ខ្មៅ​ ដើម្បី​ការពារ​ថែរក្សា​ សន្ដិសុខ​សុវត្ថិភាព​ ជូន​ប្រជាពលរដ្ឋ​ ។​ លុះ​មក​ដល់​កន្លែង​កើតហេតុ​ វេលា​ម៉ោង​ប្រមាណ​១​រំលង​អ​ធ្រា​ត្រ កម្លាំង​នគរបាល​បាន​ជួប​ក្រុម​ក្មេង​ស្ទាវ​៦​នាក់​ខាងលើ​ មាន​ម៉ូតូ​៣​គ្រឿង​ ឈប់​នៅ​មុខ​សាលាដំបូង​ខេត្ដកណ្ដាល​ ដោយ​មានការ​សង្ស័យ​កម្លាំង​នគរបាល​ក៏​បាន​ធ្វើការ​សាកសួរ​ ។​

​ជា​លទ្ធផល​ ក្រុម​ជនសង្ស័យ​ទាំង​៦​នាក់​ បាន​សារភាព​ប្រាប់​សមត្ថកិច្ច​ថា​ នៅ​ដើមឆ្នាំ​២០១៩​ ក្រុម​ជនសង្ស័យ​ឈ្មោះ​ ចាន់​ វណ្ណ​ឌី​ ,​ឈ្មោះ​ ផា​ន​ ប៊ុ​ណ្ណា​ ,​ឈ្មោះ​ ផ​ន​ ឆៃ​រ៉ាត់​ ,​ឈ្មោះ​ ម៉ាក​ វិ​ដ​ន​ ,​ឈ្មោះ​ ហៀ​ង​ មនោ​ ទាំង​៥​នាក់​នេះ​ បាន​ធ្វើ​សកម្មភាព​ ជិះ​ម៉ូតូ​ដេញ​វាយ​ជន​រង​គ្រោះ​យក​ម៉ូតូ​បាន​ចំនួន​៣​លើក​មក​ហើយ​ ៖​ លើក​ទី​១-​ នៅ​ចំណុច​ជញ្ជីង​ថ្លឹ​រថយន្ដ​ ជិត​ទីរួមខេត្ត​តាកែវ​ ពួក​គេ​បាន​ជិះ​ម៉ូតូ​ចំនួន​ ៣​គ្រឿង​ ប្រដាប់​ដោយ​ដាវ​ បាន​ធ្វើ​សកម្មភាព​ ដេញ​វាយ​ជន​រង​គ្រោះ​១​នាក់​ ដែល​ជិះ​ម៉ូតូ​ ម៉ាក​ហុងដា​ឌ្រី​ម​ ស៊េរី​ឆ្នាំ​២០១៨​ ពណ៌​ខ្មៅ​ មិន​ចាំ​ស្លាក​លេខ​ បាន​សម្រេច​ បន្ទាប់​មក​ឈ្មោះ​ ផ​ន​ ឆៃ​រ៉ាត់​ ,​ឈ្មោះ​ ម៉ាក​ វិ​ដ​ន​,​ឈ្មោះ​ ចាន់​ វណ្ណ​ឌី​ ជិះ​យក​ទៅ​លក់​នៅ​ផ្សារ​ឃ្លាំង​រំសេវ​ បាន​ទឹក​ប្រាក់​ចំនួន​ ៦០០​ដុល្លារ​ ។​ លើក​ទី​២-​នៅ​ចំណុច​ហួស​ផ្សារ​សំរោង​យោង​ ខេត្តតាកែវ​ ពួក​គេ​បាន​ជិះ​ម៉ូតូ​ចំនួន​៣​គ្រឿង​ ប្រដាប់​ដោយ​ដាវ​ បាន​ធ្វើ​សកម្មភាព​ដេញ​វាយ​នារី​រង​គ្រោះ​៣​នាក់​ ដែល​ជិះ​ម៉ូតូឌុប​គ្នា​ ម៉ាក​ហុងដា​ឌ្រី​ម​ ស៊េរី​ឆ្នាំ​២០១៦​ ពណ៌​ខ្មៅ​ មិន​ចាំ​ស្លាក​លេខ​ បាន​សម្រេច​ យក​ទៅ​លក់​បាន​ទឺ​ក​ប្រាក់​ចំនួន​ ៥០០​ដុល្លារ​សហរដ្ឋអាមេរិក​ ។​ លើក​ទី​៣-​ នៅ​ចំណុច​ជិត​វត្ត​ចំពុះក្អែក​ សង្កាត់​ព្រែក​ថ្មី​ ខណ្ឌ​ច្បារ​អំពៅ​ រាជធានី​ភ្នំពេញ​ ឈ្មោះ​ទាំង​ ៥​នាក់​ខាងលើ​ និង​ ពួក​ស្វាយ​រលំ​ ចំនួន​០៥​នាក់​ផង​ដែរ​ (​ទាំងអស់​ចំនួន​១០​នាក់​)​ ពួក​គេ​បាន​ជិះ​ម៉ូតូ​ចំនួន​៥​គ្រឿង​ បាន​ធ្វើ​សកម្មភាព​ដេញ​វាយ​ជន​រង​គ្រោះ​៣​នាក់​ ដែល​ជិះ​ម៉ូតូ​ ម៉ាក​ហុងដា​ឌ្រី​ម​ ស៊េរី​ឆ្នាំ​២០១៨​ ពណ៌​ខ្មៅ​ មិន​ចាំ​ស្លាក​លេខ​ បាន​សម្រេច​ ពួក​យក​ទៅ​លក់​នៅ​ជិត​ស្ពាន​ ៧​មក​រា​ បាន​ទឹ​ក​ប្រាក់​ចំនួន​ ៤៥០​ដុល្លារ​សហរដ្ឋអាមេរិក​ ។​

​បន្ទាប់​ពី​សមត្ថកិច្ច​ជំនាញ​ធ្វើការ​សាកសួរ​ក្រុម​ក្មេង​ស្ទាវ​ខាងលើ​រួច​ កម្លាំង​ជំនាញ​បាន​កសាង​សំណុំរឿង​បញ្ជូន​ទៅ​កាន់​សាលាដំបូង​ខេត្ដកណ្ដាល​ ដើម្បី​ចាត់ការ​តាម​នីតិវិធី​ច្បាប់​៕​