ភ្នំពេញ: បុរសស្រវឹងស្រាម្នាក់ បានបើករថយន្តកាមរីបាឡែនមួយគ្រឿង ក្នុងល្បឿនយ៉ាងលឿន ជ្រុលទៅបុកគូទ រថយន្តកុងតឺន័រពីក្រោយពេញទំហឹង បណ្ដាលឲ្យឆ្លងចរន្តអគ្គិសនីឆាបឆេះយ៉ាងសន្ធោសន្ធៅ។
ហេតុការណ៍នេះ បង្កភ្ញាក់ផ្អើលកាលវេលាម៉ោង១យប់រំលងអធ្រាត្រឈានចូលថ្ងៃច័ន្ទ ទី២៧ ខែឧសភា ឆ្នាំ២០១៩ ស្ថិតតាមបណ្ដោយផ្លូវជាតិលេខ១ ចំណុចលើស្ពានមុនីវង្សចាស់ ក្នុងសង្កាត់ទន្លេបាសាក់ ខណ្ឌចម្ការមន រាជធានី ភ្នំពេញ។
យោងតាមប្រភពពីកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសម្នាក់ បើករថយន្តកាមរីបាឡែន ពណ៌ ស ពាក់ស្លាកលេខ ភ្នំពេញ 2AM-0830 ធ្វើដំណើរក្នុងពីកើតទៅលិច បានឡើងស្ពានមុនីវង្សចាស់ ក្នុងល្បឿនលឿនបើកបរ ដោយក្នុងស្ថានភាពស្រវឹងជោកជាំ ខណ:មកដល់ចំណុចកើតហេតុ បានជ្រុលទៅបុកគូទ រថយន្តកុងតឺន័រមិនចាំស្លាកលេខពីក្រោយពេញទំហឹង បណ្ដាលឲ្យរថយន្តខ្ទេចមួយកំណាត់មុខយ៉ាងដំណំ ចំណែករថយន្តកុងតឺន័រ មិនបានឈប់ទេ ក៏បើកបន្តដំណើរទៅមុខ បាត់តែម្ដង។
ភ្លាមៗនោះដែរគេឃើញម្ចាស់រថយន្ត ចុះមកមើលរថយន្ត រួចបានចូលក្នុងរថយន្តបញ្ឆេះវិញ ស្រាប់តែឆ្លងចរន្តអគ្គិសនីឆាបឆេះតែម្ដង។ ឃើញដូចច្នោះម្ចាស់ បានដើរចេញពីរថយន្តគេចខ្លួនបាត់ ខណ:រថយន្តឆេះខ្លាំងឡើងៗ បង្កការភ្ញាក់ផ្អើលដល់ប្រជាពលរដ្ឋ ធ្វើដំណើរតាមផ្លូវឈប់មើលព្រោងព្រាត។
ក្រោយកើតហេតុសមត្ថកិច្ចមូលដ្ឋាន បានចុះមកចំណុចកើតហេតុ ទាក់ទងទៅរថយន្តពន្លត់អគ្គិភ័យមួយគ្រឿងមកបាញ់ពន្លត់ ទើបរលត់ទាំងស្រុងនៅវាលា ម៉ោង១និង៣០នាទីយប់នៅថ្ងៃខែឆ្នាំដដែល។ តែអ្វីគួរឲ្យឲ្យស្ដោកស្ដាយនោះ រថយន្តនេះបានឆេះហ្មត់ នៅតែគ្រោងឆ្អឹងតែប៉ុណ្ណោះ។
បន្ទាប់មករថយន្ត ត្រូវសមត្ថកិច្ចស្ទូចយកទៅស្នងការាជធានីភ្នំពេញ រង់ចាំដោះស្រាយតាមផ្លូវច្បាប់៕
https://youtu.be/BexXL3kihTA
មតិយោបល់