កណ្ដាលៈ នៅមុននេះបន្តិចតាមសេចក្តីរាយការណ៍បានឲ្យដឹងថា មានរថយន្តតាកូម៉ាបើកចុះទូកដររអិលកំណល់ធ្លាក់ចូលទឹកទន្លេ ស្លាប់ម្នាក់ ស្ថិតកំពង់ដរចុងកោះ ភូមិព្រែកប្រា នៅស្រុកស្អាង ខេត្តកណ្ដាល។

ដោយហេតុការណ៍នេះ សេចក្តីរាយការណ៍បានឲ្យដឹងថា នៅមុនពេលកើតហេតុរថយន្តតាកូម៉ា ពណ៌ខ្មៅមួយគ្រឿងស្លាកលេខ 2M-6152 បានបើកចុះទៅកំពង់ដរ ដើម្បីឆ្លងទឹកទៅត្រើយម្ខាងទៀត ខណៈរថយន្តចុះដល់ទូកដរ អ្នកជិះលើរថយន្តមួយចំនួនបានចុះ នៅសល់តែ២នាក់ គឺបុរសជាអ្នកបើករថយន្ត និងស្រីម្នាក់ជាជនពិការ។ នៅពេលដែលរថយន្តចុះទៅដល់ទូកដរក៏បើកទៅបុកកំណល់ឈើបណ្ដាលឲ្យរថយន្តរអិលផុសធ្លាក់ដាំក្បាលចុះទឹកតែម្ដង។

ភ្លាមនោះប្រជាពលរដ្ឋដែលធ្វើដំណើរលើទូកដរបានចុះជួយទាញយកអ្នកទាំង២នាក់ចេញពីក្នុងរថយន្ត ប៉ុន្តែអ្នកបើករថយន្តគ្រាន់តែរបួសបន្តិចបន្តួចប៉ុណ្ណោះ រីឯស្រ្តីដែលពិការបានសន្លប់ស្ដូកស្ដឹង ហើយបានស្លាប់មុនពេលបញ្ជូនដល់មន្ទីរពេទ្យ៕