ផ្ទះ ព័ត៌មានជាតិ Update៖ផឹកស្រ...

Update៖ផឹកស្រាថ្នាំក្លែមសាច់ឆ្កែ បែកើតជម្លោះ ដេញតាមចាក់ស្លាប់ម្នាក់តាមផ្លូវ សមត្ថកិច្ចចាប់ខ្លួន៣នាក់

0

ភ្នំពេញ: កម្មករសំណង់ម្នាក់ដេកដួលស្លាប់ក្នុងថ្លុកឈាម នៅតាមផ្លូវ ក្រោយពីកើតទំនាស់ទាស់សម្តីក្នុងវង់ផឹកស៊ី សុទ្ធតែអ្នករួមការងារ គ្រាដែលជិះម៉ូតូចេញមកតាមផ្លូវ ត្រូវបានជនដៃដល់ ប្រដាប់ដោយកាំបិត តាមចាក់រហូតដល់ស្លាប់ ផ្អើលអស់ប្រជាពលរដ្ឋ សមត្ថកិច្ចចុះទៅអន្តរាគមន៍ ដឹកនាំផ្ទាល់ដោយលោក វរសេនីយ៍ឯក យឹម សារ៉ាន់ អធិការខណ្ឌពោធិសែនជ័យ រហូតឃាត់នាំមនុស្ស៤នាក់ទៅសាកសួរ កាលពីវេលាម៉ោង៧និង៥០នាទីយប់ថ្ងៃទី៣១ ចែសីហា ឆ្នាំ២០១៩ នៅតាមផ្លូវលំក្នុងភូមិចោមចៅ២ សង្កាត់ចោមចៅ២ ខណ្ឌពោធិសែនជ័យ ហើយរកឃើញជនដៃដល់៣នាក់ ជាអ្នកសម្លាប់ជនរងគ្រោះ ។

ជនរងគ្រោះស្លាប់ក្នុងហេតុការណ៍ ឈ្មោះ យឿន ជឿន ភេទប្រុស អាយុ២៣ឆ្នាំ មុខរបរ កម្មករសំណង់ ស្នាក់នៅការដ្ឋានសំណង់ ភូមិព្រៃល្វា សង្កាត់ចោមចៅ២ ខណ្ឌពោធិសែនជ័យ មានស្រុកកំណើត ភូមិក្រាំងព្រៃផ្តៅ ឃុំក្រាំងតាយ៉ង ស្រុកពាមជរ៍ ខេត្តព្រៃវែង ។

តាមសម្តីបុរសឈ្មោះរិច ចាន់ណា អាយុ៣៨ឆ្នាំ មុខរបរមេជាងសំណង់ ស្នាក់នៅក្នុងការដ្ឋានសំណង់ ជាមួយជនរងគ្រោះមានស្រុកកំណើត ភូមិព្រែកធំ ឃុំអ្នកលឿង ស្រុកពាមរក៍ ខេត្តព្រៃវែង ខណ:ដែលសមត្ថកិច្ចហៅនាំទៅសាកសួរ ក្នុងចំណោមគ្នា៤នាក់នោះ បានឲ្យដឹងថា មុនកើតហេតុ គាត់ក៏នៅក្នុងវង់ផឹកស៊ីដែរ សរុបគ្នា៦នាក់រួមទាំងជនរងគ្រោះផង ទៅផឹកស្រាថ្នាំ ក្លែមសាច់ឆ្កែ នៅតូបអ្នកលក់ ក្នុងភូមិព្រៃល្វា តាំងពីវេលាម៉ោង៤និង៣០នាទីរសៀលថ្ងៃទី៣១ ខែសីហា លុះដល់វេលាម៉ោង៥ល្ងាច ជជែកលេងក្នុងវង់ផឹក ក៏មានគងសម្តី ជនរងគ្រោះ យឿន ជឿន បញ្ចេញកម្លាំងបាយ វាយ កម្មករម្នាក់ក្នុងវង់ ហើយក៏ស្ងប់ស្ងាត់ទៅវិញ នៅតែផឹកបន្ត លុះដល់វេលាម៉ោង៧និង៥០នាទីយប់ ចែកផ្លូវគ្នា ចាកចេញរៀងខ្លួន ជនរងគ្រោះជិះម៉ូតូមួយគ្រឿងមកតាមផ្លូវភូមិចោមចៅ២ ត្រូវបានជនដៃដល់ ជាអ្នកផឹកក្នុងវង់ជាមួយគ្នាដេញតាម មកដល់ចំណុចខាងលើ ប្រដាប់ដោយកាំបិត ចាក់លើជនរងគ្រោះ បណ្តាលឲ្យស្លាប់តាមផ្លូវតែម្តង ។

ក្រោយពីហៅមនុស្សក្នុងវង់ផឹកស៊ី៤នាក់ ក្រោមវត្តមានលោកវរសេនីយ៍ឯក យឹម សារ៉ាន់ អធិការខណ្ឌពោធិសែនជ័យ ដឹកនាំស្រាវជ្រាវផ្ទាល់ជុំវិញករណីខាងលើ នៅប៉ុស្តិ៍ចោមចៅ២ ឈានដល់រកមុខជនដៃដល់និងបក្ខពួក ទី១ ឈ្មោះ ខឹម សុផល ហៅ ងុយ ភេទប្រុស អាយុ៣៨ឆ្នាំ មុខរបរ រើសអេតចាយ ស្នាក់នៅភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ ជាជនដៃដល់ចាក់ផ្ទាល់ដៃ ។ ទី២ ឈ្មោះ លត សារិទ្ធ ហៅតុញ ភេទប្រុស អាយុ៣៩ឆ្នាំ មុខរបរ សំណង់ ស្នាក់នៅ សង្កាត់ចោមចៅទី១ ខណ្ឌពោធិ៍សែនជ័យ ។ ទី៣ ឈ្មោះ ចាប លាង ភេទស្រី អាយុ៥៥ឆ្នាំ មុខរបរនៅផ្ទះ ស្នាក់នៅភូមិចោមចៅ១ សង្កាត់ចោមចៅ ខណ្ឌពោធិ៍សែនជ័យ ។

បច្ចុប្បន្នជនសង្ស័យទាំងអស់ត្រូវក៏សាងសំណុំរឿងបញ្ជូនទៅកម្លាំងជំនាញដើម្បីចាត់ការតាមនីតិវិធី៕

Leave a Reply

This site uses Akismet to reduce spam. Learn how your comment data is processed.