បន្ទាយមានជ័យ: មន្ដ្រីកាំកុងត្រូលខេត្តបន្ទាយមានជ័យ បានធ្វើការអំពាវនាវ ដល់ក្រុមអាជីវករ ទាំងអស់ ធ្វើយ៉ាងណា ត្រូវបញ្ឈប់ការលក់ទំនិញផុតការបរិច្ឆេទ ដែលបណ្ដាលឲ្យប៉ះពាល់សុខភាពមនុស្ស។ ដោយឡែក ប្រជាពលរដ្ឋវិញ មុនទិញទំនិញយកទៅប្រើប្រាស់ គប្បី ត្រូវពិនិត្យមើលការបរិច្ឆេទ និងទំនិញ ដែលប៉ះពាល់ដល់សុខភាព របស់បងប្អូន។
លោក ហុង លៀង អនុប្រធានទី១ សាខាកាំកុងត្រូលខេត្តបន្ទាយមានជ័យ ទទួលបន្ទុកស្ថិតិទីផ្សារ ថ្លែងកាលថ្ងៃទី២០ ខែកក្កដា ឆ្នាំ២០១៦ ខណ: មន្ត្រីសាខាកាំកុងត្រូល ខេត្តបន្ទាយមានជ័យ សហការជាមួយសមត្ថកិច្ចចម្រុះ ចុះធ្វើការអប់រំណែនាំ ពីគុណភាពម្ហូបអាហារ ដល់ក្រុមអាជីវករលក់ដូរទំនិញ ជាច្រើននាក់ ក្នុងផ្សារអូរស្ងួត និងផ្សារបន្ទាយនាង នៃស្រុកមង្គលបូរី ព្រមទាំងដកហូតទំនិញខូចគុណមួយចំនួនធំ។
ក្នុងការចុះត្រួតពិនិត្យ មន្ដ្រីរបស់លោកក៏បានធ្វើការដកហូតទំនិញខូចគុណភាពមួយចំនួនដូចជា៖ កម្ទេចមីចំនួន១៧៧ថង់ ស្មើនិង១៣០គីឡូក្រាម ទឹកសណ្ដែក ៦ដប ទឹកក្រូច៥ដប ប្រហិតវៀតណាម៥ថង់ ម្សៅអូវ៉ាន់ទីន ១១០០កញ្ចប់ ស្មើ និង៥៥គីឡូក្រាម និងស្ករគ្រាប់ក្មេង២៧បន្ទះ ។
លោក អនុប្រធានទី១ ទទួលបន្ទុកស្ថិតិទីផ្សារ បានលើកឡើងទៀតថា ដោយអនុវត្តតាមការណែនាំពីសំណាកលោក ស៊ាន ស៊ីណាត ប្រធានសាខាកាំកុងត្រូលខេត្តបន្ទាយមានជ័យ លើសុខមាលភាពបងប្អូនប្រជាពលរដ្ឋ មន្ត្រីកាំកុងត្រូលរបស់លោកបានសហការជាមួយមន្ត្រីមន្ទីរ ពាណិជ្ជកម្មខេត្ត និងកម្លាំងនគរបាលសេដ្ឋកិច្ចខេត្ត និងក្រសួងចុះពិនិត្យផ្សារចំនួន២កន្លែង ១.ផ្សារបន្ទាយនាង ឃុំបន្ទាយនាង ២.ផ្សារអូរស្ងួតឃុំបន្ទាយនាង ស្រុកមង្គលបូរី ខេត្តបន្ទាយមានជ័យ៕
មតិយោបល់