កណ្តាល: មនុស្ស០៤នាក់ បានរងរបួសធ្ងន់ និងស្រាល ខណៈបើកម៉ូតូបុកគ្នា ដែលគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១៩និង០០នាទីយប់ ថ្ងៃទី២១ ខែកក្តដា ឆ្នាំ២០១៧ នៅលើផ្លូវ២១ ក្នុងភូមិព្រែកសំរោង០៣ សង្កាត់តាខ្មៅ ក្រុងតាខ្មៅ ខេត្តកណ្តាល។

បើតាមសាក្សីបានឲ្យដឹងថា មុនពេលកើតហេតុគេឃើញម៉ូតូម៉ាកSL ពណ៌ទឹកប្រាក់ ពាក់ស្លាកលេខ ភ្នំពេញ 1CP.8586 បានបើកបរក្នុងល្បឿនលឿនពីត្បូងទៅជើង (ស្អាងទៅភ្នំពេញ) លុះដល់កន្លែងកើតហេតុបានវ៉ារថយន្តមួយគ្រឿងមិនផុត ទើបបណ្តាលឲ្យទៅបុកម៉ូតូ សង់សេ១០០ ពណ៌ក្រហម ទិសដៅបញ្ច្រាស់គ្នា ពីជើងមកត្បូង(ភ្នំពេញទៅស្អាង) ចំពីមុខ បណ្តាលឲ្យរបួសទាំង០៤នាក់។

ភ្លាមៗត្រូវបានកម្លាំងនគរបាលចរាចរណ៍ក្រុងតាខ្មៅ ធ្វើការវាស់វែង និងយកម៉ូតូទាំងពីរគ្រឿងទៅរក្សាទុកនៅអធិការដ្ឋានក្រុងតាខ្មៅ ដើម្បីចាត់ការតាមនីតិវិធីច្បាប់៕