ប៉ៃលិនៈ យោងតាមផេក អគ្គនាយកដ្ឋានកាំកុងត្រូល នៅថ្ងៃទី១២ ខែតុលា ឆ្នាំ២០១៩ មន្រ្តីជំនាញ សហការជាមួយមន្ត្រីមន្ទីរពាណិជ្ជកម្មខេត្ត និងគណៈកម្មការផ្សារ បានបន្តចុះផ្សព្វផ្សាយអំពីគុណភាព សុវត្ថិភាពម្ហូបអាហារ ត្រួតពិនិត្យផលិតផលម្ហូបអាហារ និងទំនិញវេចខ្ចប់ស្រាប់ នៅតាមគេហដ្ឋាន ស្ថិតភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
គោលបំណងនៃការត្រួតពិនិត្យ គឺដើម្បីស្រាវជ្រាវ ទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា និងផុតកំណត់កាលបរិច្ឆេទប្រើប្រាស់ ដែលធ្វើអោយប៉ះពាល់ដល់សុខភាពប្រជាពលរដ្ឋ ។

ជាលទ្ធផល មន្ត្រីជំនាញបានរកឃើញទំនិញខូចគុណភាព និងហួសកាលបរិច្ឆទប្រើប្រាស់ មួយចំនួនដូចជា៖
– កាកាវ ចំនួន ៥កំប៉ុង ស្មើនឹង ៥គីឡូក្រាម
– ទឹកដោះគោកំប៉ុងរាវ ចំនួន ៣២កំប៉ុង ស្មើនឹង ១៤គីឡូក្រាម
– ទឹកដោះគោឆៅកំប៉ុង ចំនួន ៦កំប៉ុង ស្មើនឹង ១គីឡូកក្រាម
– បបរកំប៉ុងកូនក្មេង ចំនួន ៥កំប៉ុង ស្មើនឹង ២គីឡូក្រាម
– ទំពាំងបាយជូក្រៀម ចំនួន ៣០ប្រអប់ ស្មើនឹង ៩គីឡូក្រាម
– ស្រាបៀដប ចំនួន ៤ដប ស្មើនឹង ១.៣២គីឡូក្រាម។

បន្ទាប់មកមន្ត្រីជំនាញ បានធ្វើកំណត់ហេតុដកហូត ទំនិញទាំងនោះយកទៅរក្សាទុក ដើម្បីធ្វើការកម្ទេចចោល និងបានធ្វើការណែនាំដល់អាជីវករដទៃ អោយយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀត៕