បន្ទាមានជ័យៈ ផ្ទះ១ខ្នង មានទទឹង៥ម៉ែត្រ និងបណ្តោយ៧ម៉ែត្រ ព្រមទាំងកង់ចំនួន៣គ្រឿង ត្រូវបានលោក ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យ ដឹកនាំមេបញ្ជាការរង មេបញ្ជាការស្រុក-ក្រុង ធ្វើការប្រគល់ជូនដល់នាយអាវុធហត្ថម្នាក់ ដែលកំពុងជួបការលំបាក។

ការប្រគល់នេះ ធ្វើឡើងកាលពីថ្ងៃទី២២ ខែកក្កដា ឆ្នាំ២០១៦ នៅក្នុងមូលដ្ឋាន ស្រុកព្រះនេត្រព្រះ ខេត្តបន្ទាយមានជ័យ។

លោក ឱ បូរិន្ទ មេបញ្ជាការកងរាជអាវុធហត្ថ ខេត្តបន្ទាយមានជ័យ បានឲ្យដឹងថា យោងបទបញ្ជារបស់លោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាកងរាជអាវុធហត្ថ លើផ្ទៃប្រទេសបានណែនាំមេបញ្ជាការរាជធានី-ខេត្ត ចូលរួមជួយដោះស្រាយរាល់ទុក្ខលំបាករបស់នាយ នាយរង និងពលអាវុធហត្ថក្រោមឱវាទ ដែលជួបការលំបាក និងគ្រោះមហន្តរាយផ្សេងៗ ខណៈនេះរូបលោកផ្ទាល់ ក៏ដូចជា អស់លោកជាមេបញ្ជាការរង មេបញ្ជាការមូលដ្ឋានក្រុង/ស្រុក និងនាយអាវុធហត្ថ បានឯកភាពគ្នា សង់ផ្ទះ១ខ្នង ដែលមានទទឹង៥ម៉ែត្របណ្តោយ៧ម៉ែត្រ ក្នុងនោះមានផ្ទះបាយ បង្គន់អនាម័យ និងកង់ចំនួន៣គ្រឿង រួមនិងសម្ភារៈប្រើប្រាស់ គ្រឿងឧបភោគ បរិភោគ ជូនដល់ជូនលោកនាយចំណង់ គង់ សុវណ្ណ នាយអាវុធហត្ថស្រុកព្រះនេត្រព្រះ ដែលកំពុងជួបការលំបាក និងជីវភាពខ្វះខាតក្នុងការរស់នៅមានប្រពន្ធ និងកូន ក្នុងបន្ទុកចំនួន៤នាក់។

លោក ឱ បូរិន្ទ មានប្រសាសន៍ទៀតថា លោកនឹងបន្តជួយដល់ សមាជិកអាវុធហត្ថ ដែលជួបការលំបាកជាបន្តបន្ទាប់ ដោយអនុវត្តតាមបទបញ្ជារបស់ថ្នាក់លើ និងជាវប្បធម៌ចែករំលែក ដែលប្រមុខរាជរដ្ឋាភិបាល តែងតែយកចិត្តទុក្ខដាក់ និងចុះជួយរំលែកទុក្ខដល់ប្រជាពលរដ្ឋដែលជួបការលំបាក៕