ភ្នំពេញៈ កម្លាំងកងរាជអាវុធហត្ថខណ្ឌដូនពេញ និងអាជ្ញាធរខណ្ឌបានចេញប្រតិបត្តិការណ៍បង្រ្កាបការជួញដូរគ្រឿងញៀនមួយសបុកធំដោយឃាត់ខ្លួនជនសង្ស័យប្រុស និង ស្រីចំនួន០៩នាក់ព្រមទាំងដកហូតថ្នាំញៀនច្រើនកញ្ចប់ផងដែរ កាលពីវេលាម៉ោង ៥ល្ងាច ថ្ងៃទី២៥ ខែកក្កដា ឆ្នាំ២០១៦ចំណុចភូមិ២២ សង្កាត់ស្រះចក ខណ្ឌដូនពេញ ។

មន្ត្រីអាវុធហត្ថខណ្ឌដូនពេញបានឲ្យដឹងថា នៅមុនពេលឃាត់ខ្លួនក្រុមជនសង្ស័យជួញដូរនិងប្រើប្រាស់គ្រឿងញៀនទាំងនោះគឺកម្លាំងជំនាញបានស្រាវជ្រាវពីមុខសញ្ញានោះជាយូរមកហើយ លុះដល់ថ្ងៃនេះដឹងយ៉ាងច្បាស់ថា ជនសង្ស័យទាំងនោះកំពុងប្រមូលផ្តំុជួញដូរគ្រឿងញៀននៅចំណុចកើតហេតុនោះ ទើបកម្លាំងអាវុធហត្ថខណ្ឌដូនពេញក្រោមការដឹកនាំនិងបញ្ជាផ្ទាល់ពីលោកថោង ពិសិដ្ឋ មេបញ្ជាការខណ្ឌដូនពេញ និង លោកសុខ ពេញវុធ អភិបាលរងខណ្ឌ ចុះបង្កាបអ្នកលក់ និង ជក់គ្រឿងញៀនត្រង់ចំនុច ភូមិ២២ សង្កាត់ស្រះចក ខណ្ឌដូនពេញ ឃាត់ខ្លួនបានចំនួន០៩នាក់ ក្នុងនោះមានប្រុស០៧នាក់ ស្រី០១នាក់ និងភេទទីបីបានម្នាក់ ប្រមូលបានគ្រឿងញៀនកញ្ចប់តូចៗចំនួន ២៨កញ្ចប់ វិទ្យុសំរាប់ទាក់ទងពីរគ្រឿង និងប្រដាប់ជក់មួយចំនួន បញ្ចូនទៅអវុហត្ថខណ្ឌដូនពេញដើម្បីកសាងសំណំុរឿងបញ្ជូនទៅតុលាការ៕