ភ្នំពេញៈ កាលពីវេលាម៉ោង ៩ និង ១៥នាទីយប់ថ្ងៃទី៥ ខែធ្នូ ឆ្នាំ២០១៩ ស្ថិតតាមបណ្ដោយផ្លូវ៦០ម៉ែត្រ ក្នុងសង្កាត់ចាក់អង្រែលើ ខណ្ឌមានជ័យ មានករណីគ្រោះថ្នាក់ចរាចរណ៍ រវាងរថយន្តបុករ៉ឺម៉កកង់បីពីក្រោយ បណ្ដាលឲ្យមានមនុស្សរបួសធ្ងន់ស្រាលជាច្រើននាក់។

តាមប្រភពពីជនរងគ្រោះ (របួសស្រាល) ជាអ្នកបើករ៉ឺម៉ក បានឲ្យដឹងថា រូបគាត់ និងគ្នីគ្នា០៧នាក់ទៀត បានធ្វើដំណើរតាមម៉ូតូសណ្ដោងរ៉ឺម៉កមួយគ្រឿង ដោយដឹកវាំងននចេញពីកម្មវិធីមួយកន្លែង តាមបណ្តោយផ្លូវ៦០ម៉ែត្រ ពីត្បូងទៅជើង ក្នុងល្បឿនល្មម។ មកដល់ចំណុចកើតហេតុ ស្រាប់តែមានរថយន្តមួយគ្រឿង ម៉ាកម៉ាស្ដារ ពណ៌ស ពាក់ស្លាកលេខ រដ្ឋ 20 2-8789 បើកបរដោយបុរសម្នាក់ សង្ស័យស្រវឹងស្រា និងអ្នករួមដំណើរម្នាក់ ធ្វើដំណើរស្របគ្នា ក្នុងល្បឿនយ៉ាងលឿន មកបុកម៉ូតូសណ្ដោងរ៉ឺម៉កពីក្រោយពេញទំហឹង បណ្ដាលឲ្យរ៉ឺម៉កក្រឡាប់ផ្ងារជើង ធ្វើឲ្យអ្នកជិះរងរបួសធ្ងន់៤នាក់ ស្រាល៤នាក់។

ភ្លាមៗផងដែរ ជនរងគ្រោះ ត្រូវបានរថយន្តសាម៉ុយ ដឹកបញ្ចូនទៅសង្គ្រោះនៅមន្ទីពេទ្យ ។ ចំណែកអ្នកបើករថយន្តបង្ក និងអ្នករួមដំណើរ បានគេចខ្លួនបាត់ស្រមោល។

ក្រោយកើតហេតុ សមត្ថកិច្ចមូលដ្ឋាន បានចុះមកដល់ រួចទាក់ទងទៅជំនាញ ឲ្យមកធ្វើការវាស់វែង និងស្ទួករថយន្តបង្ក ម៉ូតូសណ្ដោងរ៉ឺម៉ក ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាល រាជធានីភ្នំពេញ ដើម្បីដោះស្រាយតាមផ្លូវច្បាប់៕