ភ្នំពេញៈ អង្គុយផឹកស៊ីទាន់សម្ដីគ្នា បង្កជាហិង្សាយកកាំបិតប័ងតោទៅកាប់គូទំនាស់រងរបួសបែកក្បាលដេរចំនួន១៣ថ្នេរ ត្រូវកម្លាំងអាវុធហត្ថធ្វើការឃាត់ខ្លួន។

ហេតុការណ៍នេះបានកើតឡើងកាលពីវេលាម៉ោង៨និង៣០នាទីល្ងាចថ្ងៃទី២៥ ខែកក្កដា ឆ្នាំ២០១៦ នៅចំណុចបូរីអរ័គីដេ ស្ថិតក្នុង ភូមិត្រពាំងឈូក សង្កាត់ទឹកថ្លា ខណ្ឌសែនសុខ។

ជនបង្កមានឈ្មោះ កូ វិត ភេទប្រុស អាយុ៣៧ឆ្នាំ មុខរបរជាងសំណង់ ស្នាក់នៅកន្លែងកើតហេតុ ចំណែកជនរងគ្រោះមានឈ្មោះ យិន យាន ភេទប្រុស អាយុ៣៤ឆ្នាំ មុខរបរកម្មករសំណង់ ស្នាក់នៅកន្លែងកើតហេតុជាមួយគ្នា រងរបួសត្រូវក្បាលពីកន្លែងដេរចំនួន១៣ថ្នេរ។

ប្រភពពីសមត្ថកិច្ចអាវុធហត្ថបានឲ្យដឹងថា មុនពេលកើតហេតុ ជនរងគ្រោះ និងជនបង្កបានអង្គុយផឹកស៊ីជាមួយគ្នា ពេលផឹកបានមួយសន្ទុះក៏កើតរឿងឈ្លោះប្រកែកគ្នា ពេលនោះជនរងគ្រោះបានបោះចានមកខាងមុខជនបង្ក ហើយជនបង្កបានទាញកាំបិទមកកាប់បំបែកចាននោះ បន្ទាប់មកជនរងគ្រោះបានបោះចាន១មកទៀត តែត្រូវជនបង្កកាប់បែកទៀត ពេលនោះក៏មានការប្រតាយប្រតប់ធ្វើឲ្យជនបង្កខឹងក៏ហក់ទៅកាប់ជនរងគ្រោះ២កាំបិតត្រូវចំក្បាល បណ្តាលឲ្យបែកហូរឈាមតែម្តង។

ក្រោយពេលកើតហេតុក៏មានសន្តិសុខដែលយាមនៅទីនោះបានរត់ទៅជួយអន្តរាគមន៍ដោយជួយហៅគ្រួពេទ្យ ដែលប្រចាំការនៅបូរីនោះមកពិនិត្យនិងព្យាបាលនៅទីនោះតែម្ដង។

ចំណែកជនបង្កត្រូវសន្តិសុខឃាត់ខ្លួនប្រគល់ឲ្យអាវុធខណ្ឌសែនសុខយកមកសាកសួរនៅមូលដ្ឋានកងរាជអាវុធហត្ថខណ្ឌ និងកសាងសំណុំរឿងបញ្ជួនជនបង្កទៅកាន់ការិយាល័យព្រហ្មទណ្ឌរាជធានីភ្នំពេញចាត់ការបន្ត៕