បើទោះជាមានការលើកឡើងពីទំនាក់ទំនងមិនប្រក្រតី ក៏តារាសម្តែងលោក ឈួន ពន្លឺ និង ពិធីករ លោក នាង វ៉ាង សាន់ នៅតែមិនខ្វល់ ហើយបន្តចាប់ដៃគ្នា។ អ្នកទាំងពីរ បានធ្វើពិធីខួប២ឆ្នាំភោជនីយដ្ឋាន « សាន់ ឡាយ » បង្ហាញពីទំនាក់ទំនងស្អិតរមួតលើសដើម បន្ទាប់ពីចាប់ដៃគ្នាបានដំណើរការហាងនេះ ដោយជោគជ័យ។

ពិធីដែលបានធ្វើឡើងនោះ គឺនៅថ្ងៃទី ៦ ខែ មករា ឆ្នាំ ២០២០ ដោយ លោក ឈួន ពន្លឺ និង លោក នាង វ៉ាង សាន់ បានរួមគ្នាជាថ្មីម្ដងទៀត ដើម្បីធ្វើពិធីគម្រប់ខួប២ឆ្នាំ នៃការបង្កើតភោជនីយដ្ឋានរបស់ខ្លួន នៅម្ដុំស្តុបទួលទំពូង។ នៅក្នុងពិធីជប់លៀងគម្រប់ខួប២ឆ្នាំរបស់ភោជនីយដ្ឋាននេះផងដែរ ក៏ឃើញមានវត្តមានតារាសិល្ប:ល្បីៗ ជាច្រើនរូបបានអញ្ជើញ ចូលរួមជាកិត្តយស។ ក្នុងនោះរួមមាន ម្ចាស់ផលិតកម្ម DP លោក កុយ ស៊ីឌឿន, កញ្ញា វណ្ណា វត្តី , លោក អ៉ឹម ជីវ៉ា, កញ្ញា ថន លក្ខិណា និងតារាល្បីៗជាច្រើនរូបទៀត មកចូលរួមអបអរក្នុងពិធីនេះ។

លោកបានបញ្ជាក់ ដោយសារមានការគាំទ្រពីសំណាក់ភ្ញៀវជាច្រើន លោកក៏សម្រេចថា ចូលឆ្នាំថ្មីនេះ លោកបានរួមគ្នាចំណាយទុនបន្ថែមទៀត ដើម្បី Update បន្ថែមជាលក្ខណ: Skybar តនៅពីខាងលើភោជនីដ្ឋានទៀត ដើម្បីឱ្យមានភាពងាយស្រួល សម្រាប់បំពេញតម្រូវការភ្ញៀវគ្រប់២៤ម៉ោង។ ហើយក៏ត្រៀមបន្ថែមភ្លើងពណ៌ ព្រមទាំងការដេគ័រផ្សេងៗ ជាច្រើនទៀត ដើម្បីឱ្យកាន់តែប្រណិត និងទាក់ទាញជាងនេះ។ មិនតែប៉ុណ្ណោះ ក៏មានរួមបញ្ចូលបន្ថែមទាំងមុខម្ហូបប្លែកៗ ដែលមានរសជាតិដើមពីបរទេស ពិសេសគឺពង្រឹង និងរក្សានូវគុណភាព ទាំងតម្លៃ ផ្នែកសេវាកម្ម ពិសេសអនាម័យផងដែរ។

លោកសង្ឃឹមថា ភ្ញៀវចាស់ថ្មីទាំងអស់ នឹងបន្តការគាំទ្រហាងរបស់លោក ពិសេសពេញចិត្តនូវគម្រោង skybar ថ្មីរបស់ហាង។ មិនតែប៉ុណ្ណោះលោកក៏នឹងត្រៀមបន្ថែម អ្វីដែលជាចំណុចខ្វះខាត និងបន្តរកអ្វីដែលថ្មីដើម្បីបំពេញតម្រូវការរបស់អតិថិជនមិនឱ្យខកបំណងនោះទេ៕