ស្វាយរៀង: កាលពីវេលាម៉ោង ១១កន្លះព្រឹកថ្ងៃទី៧ ខែមករា ឆ្នាំ២០២០ ស្ថិតនៅភូមិដូនស ឃុំដូនស ស្រុកស្វាយជ្រំ ខេត្តស្វាយរៀង មានករណីឃាតកម្មដ៏សាហាវមួយ បណ្តាលឲ្យបុរសម្នាក់ បានស្លាប់ភ្លាមៗ នៅក្នុងថ្លុកឈាម។

ជនរងគ្រោះឈ្មោះ ឥន ស៊ីថា ភេទប្រុស អាយុ៥៦ឆ្នាំ អតីត:ទាហាន នៅខេត្តមណ្ឌលគីរី មានទីលំនៅភូមិ-ឃុំកើតហេតុ។ ជនសង្ស័យឈ្មោះ ព្រំ ថុល ភេទប្រុស អាយុ៥៧ឆ្នាំ មានជំងឺសសៃប្រសាទចំនួន៥ឆ្នាំមកហើយ ដែលមានផ្ទះក្បែគ្នា និងជនរងគ្រោះ។

ដំណើររឿង៖ នៅវេលាកើតហេតុ គេឃើញជនរងគ្រោះ ទើបចេញេពីផឹកស៊ី រួចក៏ត្រលប់មកផ្ទះវិញ បានទុកម៉ូតូ និងកូនស្រីនៅខាងមុខផ្ទះ ហើយដើរទៅផ្ទះជនសង្ស័យ ចម្ងាយ៥០មែត្រ ពេលទៅដល់បានអង្គុយលើគ្រែក្រោមផ្ទះ មិនច្បាស់មានរឿងអ្វីទេ ស្រាប់តែជនសង្ស័យខឹង ទាញពូថៅវាយទៅលើ ជនរងគ្រោះចំនួន១០ពូថៅ ត្រូវចំក្បាល និងដើមទ្រូងឆ្អឹងជំនីជាំ បណ្ដាលឲ្យស្លាប់ភ្លាមៗតែម្ដង។

ក្រោយកើតហេតុ ជនសង្ស័យ ត្រូវបានសមត្ថកិច្ច ឃាត់ខ្លួនយកទៅសួរនាំនៅប៉ុស្ត៍ ចំណែកសពបន្ទាប់ពីធ្វើកោសល្យវិច័យរួច បានប្រគល់ឲ្យគ្រួសារយកទៅធ្វើបុណ្យតាមប្រពៃណី៕