ផ្ទះ ព័ត៌មានជាតិ យុទ្ធនាការចែក...

យុទ្ធនាការចែកម៉ាស ដោយពុំគិតប្រាក់ ជូនដល់ភ្ញៀវទេសចរណ៍ ជាតិ-អន្តរជាតិ អាជីវករ ពលករ កម្មករអូសរទេះ អ្នករត់ម៉ូតូឌុប និងប្រជាពលរដ្ឋ

0

បន្ទាយមានជ័យ: យោងតាមផេកអគ្គនាយកដ្ឋានអន្តោប្រវេសន៍បានឲ្យដឹងថា នៅថ្ងៃទី២៧ ខែមករា ឆ្នាំ២០២០ វេលាម៉ោង ៧និង៣០នាទីព្រឹក ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានបើកយុទ្ធនាការចែកម៉ាស ដោយពុំគិតប្រាក់ ជូនដល់ភ្ញៀវទេសចរណ៍ ជាតិ-អន្តរជាតិ អាជីវករ ពលករ កម្មករអូសរទេះ អ្នករត់ម៉ូតូឌុប និងប្រជាពលរដ្ឋ ដែលធ្វើដំណើរឆ្លងកាត់ តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ព្រះរាជាណាចក្រកម្ពុជា និងច្រកទ្វារព្រំដែនអន្តរជាតិ ខ្លងលឹង ខេត្តស្រ:កែវ នៃព្រះរាជាណាចក្រថៃ។

យុទ្ធនាការនេះ ដឹកនាំដោយលោក ឧត្ដមសេនីយ៍ត្រី អ៊ី ចម្រើន នាយប៉ុស្តិ៍ និងមន្ត្រីក្រោមឱវាទ ដោយមានការចូលរួមពីលោក គាត ហ៊ុល អភិបាល នៃគណ:អភិបាលក្រុងប៉ោយប៉ែត និងសហការី ព្រមទាំងសមត្ថកិច្ចអន្តោប្រវេសន៍ថៃ ច្រកទ្វារព្រំដែនអន្តរជាតិខ្លងលឹក មួយចំនួនទៀត នៅចំណុចច្រកចេញ-ចូលគល់ស្ពានមិត្តភាពកម្ពុជា-ថៃ ស្ថិតនៅភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ ។

ការចែកម៉ាសនេះ ក្នុងគោលបំណងជួយទប់ស្កាត់ជំងឺផ្លូវដង្ហើម (វីរុសCORONA) ស្របពេលដែលជំងឺនេះកំពុងតែឆ្លងរាតត្បាត នៅតាមបណ្ដាប្រទេសមួយចំនួនលើពិភពលោក ។

តាមការរំពឹងទុក ក្នុងមួយថ្ងៃ ប៉ុស្តិ៍អាចចែកម៉ាសអស់ជាមធ្យោម ១៥,០០០ ទៅ ១៨,០០០ម៉ាស ហើយគ្រោងនឹងបន្តចែកជូនអ្នកដំណើរឆ្លងកាត់ ដោយឥតគិតថ្លៃ រហូតដល់មានសេចក្ដីប្រកាស របស់ក្រសួងសុខាភិបាល ស្ដីពី វីរុសCORONA ត្រូវបានបញ្ចប់ និងត្រូវចំណាយម៉ាសអស់យ៉ាងតិច ១,០០០,០០០ម៉ាស (មួយលានម៉ាស) ក្នុងរយ:ពេល ០១ខែ៕

មតិយោបល់