កណ្ដាល: យុវជនម្នាក់ ត្រូវនគរបាលស្រុកកណ្ដាលស្ទឹងធ្វើការឃាត់ខ្លួន ករណីរំលោភលើទំនុកចិត្ដ ក្រោយពីជនសង្ស័យរូបនេះ បានខ្ចីម៉ូតូគេជិះថាទៅលេងផ្ទះមិត្ដភក្ដិមួយភ្លែត តែជិះទៅបាត់រហូត ពុំឲ្យម្ចាស់គេវិញទេ ដែលករណីនេះ បានកើតឡើងកាលពីថ្ងៃទី១១ ខែកុម្ភ: ឆ្នាំ២០២០ វេលាម៉ោង ១១និង១០នាទី ត្រង់ចំណុចភូមិឆ្មាពួន ឃុំជើងកើប ស្រុកកណ្ដាលស្ទឹង ខេត្តកណ្ដាល ។ លុះ៣ថ្ងៃក្រោយមក ថ្ងៃទី១៤ ខែកុម្ភ: ឆ្នាំ២០២០ ជនរងគ្រោះជាម្ចាស់ម៉ូតូឃើញជនសង្ស័យ ក៏ចាប់ខ្លួនប្រគល់ឲ្យសមត្ថកិច្ចចាត់ការតាមនីតិវិធីច្បាប់ ។

ជនសង្ស័យឈ្មោះ ឆែម ឆោម ភេទប្រុស អាយុ ២១ឆ្នាំ ទីលំនៅបច្ចុប្បន្នភូមិឆ្មាពួន ឃុំជើងកើប ស្រុកកណ្តាលស្ទឹង ខេត្តកណ្ដាល ។
ជនរងគ្រោះឈ្មោះ ហាច ចាន់ ភេទប្រុស អាយុ ២៦ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ។

ដំណើររឿង៖ នៅថ្ងៃកើតហេតុ ថ្ងៃទី១១ ខែកុម្ភ: ឆ្នាំ២០២០ ជនរងគ្រោះបានជិះម៉ូតូម៉ាកហុងដាគុបជ្រុង ធុនសេ៥០ ពណ៌ខៀវ(ជាម៉ូតូចាស់) ជិះចេញពីផ្ទះរបស់ខ្លួនភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ មកលេងផ្ទះឈ្មោះ ណាត ភេទប្រុស នៅភូមិឆ្មាពួន ឃុំជើងកើប ស្រុកកណ្ដាលស្ទឹង ខេត្តកណ្ដាល ពេលមកដល់ផ្ទះឈ្មោះ ណាត ជនរងគ្រោះ និងម្ចាស់ផ្ទះ រួមទាំងជនសង្ស័យបាននាំគ្នាផឹកស្រាអស់ចំនួនមួយលីត្រ ពេលនោះជនសង្ស័យ ឲ្យជនរងគ្រោះឲ្យជិះម៉ូតូជូនខ្លួនទៅលេងផ្ទះឈ្មោះ មុត ភេទប្រុស នៅភូមិឃុំជាមួយជនសង្ស័យ ខណ:មកដល់ផ្ទះឈ្មោះ មុត ក៏នាំគ្នាអង្គុយជជែកគ្នាលេង លុះដល់ម៉ោងកើតហេតុជនសង្ស័យបានខ្ចីម៉ូតូរបស់ជនរងគ្រោះថា ទៅផ្ទះមិត្តភក្តិមួយភ្លែត ហើយក៏ទៅបាត់រហូតតែម្ដង ។ លុះមកដល់ថ្ងៃទី១៤ ខែ/ឆ្នាំដដែល វេលាម៉ោង១០ព្រឹក ជនរងគ្រោះបានឃើញជនសង្ស័យ ក៏ចាប់ខ្លួនជនសង្ស័យ រួចប្រគល់ឲ្យសមត្ថកិច្ចនគរបាលប៉ុស្តិ៍ជើងកើប ដើម្បីចាត់ការតាមនីតិវិធីច្បាប់ ៕