ភ្នំពេញ: កម្លាំងជំនាញឃាត់ខ្លួនស្ត្រីជនជាតិខ្មែរម្នាក់ និងជនបរទេស៣នាក់ ពាក់ព័ន្ធករណី២ផ្សេរគ្នារួមមាន

ករណីទី១ នៅថ្ងៃទី១២ ខែកុម្ភ: ឆ្នាំ២០២០ ស្ថិតសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ
វត្ថុតាងដកហូតបាន៖
-ម៉ូតូ០១គ្រឿង ម៉ាកស្កុបពី ពណ៌ស ពាក់ផ្លាកលេខ ភ្នំពេញ 1IC-7298
-ទូរស័ព្ទ០៤គ្រឿង
-ក្រដាស់ដកលុយវីង០១សន្លឹក (ដកមិនបានសម្រេច)។

ដំណើររឿង៖ មុនពេលកើតហេតុម្ចាស់ Facebook ឈ្មោះ Michael Johnson មានទំនាក់ទំនង ជាមួយជនរងគ្រោះឈ្មោះ វណ្ណនី ភេទស្រី អាយុ ៥៥ ឆ្នាំ មុខរបរកសិករ រស់នៅឃុំបឹងគ្រំ ស្រុកល្វាឯម ខេត្តកណ្តាល តាម Facebook អស់រយ:ពេលពីរខែបន្ទាប់មកឈ្មោះ Michael Johnson ធ្វើការលួងលោមបោកប្រាស់ជនរងគ្រោះតាមរយ: Messenger ដោយប្រាប់ថាជាជនជាតិអង់គ្លេស មានចិត្តអាណិតអាសូរជនរងគ្រោះ ព្រោះឃើញនិងដឹងថាជនរងគ្រោះ មានជីវភាពខ្សត់ខ្សោយ ខ្វះជំរកស្នាក់នៅសមរម្យ ដូចនេះគេនឹងផ្ញើប្រាក់ គ្រឿងអលង្កា សម្ភារ: ដើម្បីសង់ផ្ទះ និងផ្គត់ផ្គង់ជីវភាពគ្រួសារឲ្យប្រសើរឡើង។ ខណ:មកដល់ថ្ងៃទី០៨ ខែកុម្ភ: ឆ្នាំ២០២០ ម្ចាស់អាខោនឈ្មោះ Michael Johnson ទាក់ទងទៅជនរងគ្រោះតាមរយ: Messenger ឲ្យផ្ញើលុយជាបន្តបន្ទាប់នៅក្នុងថ្ងៃទី០៨ ខែកុម្ភ: ឆ្នាំ២០២០ គិតជាទឹកប្រាក់សរុបអស់ចំនួន៨,៤៥០ដុល្លារសហរដ្ឋអាមេរិក ក្រោយមកជនរងគ្រោះដឹងថាគេបោកក៏ទៅដាក់ពាក្យបណ្ដឹងនៅប៉ុស្តិ៍នគរបាល ដើម្បីឲ្យសមត្ថកិច្ចជួយអន្តរាគមន៍។

បន្ទាប់ពីទទួលបណ្ដឹង សមត្ថកិច្ចជំនាញធ្វើការស្រាវជ្រាវកំណត់មុខសញ្ញាជនសង្ស័យឈ្មោះ រ៉ុម សុខលាង ភេទស្រី អាយុ ៣៥ ឆ្នាំ មុខរបរមិនពិតប្រាកដ ដែលជាអ្នកដើរតួជាអ្នកធ្វើការប្រៃសណីយ៍ និងជាអ្នកទៅដកប្រាក់ ដែលជនរងគ្រោះវេរប្រាក់តាម Wing។ លុះដល់ថ្ងៃទី១២ ខែកុម្ភ: ឆ្នាំ២០២០ កម្លាំងជំនាញបានឃាត់ខ្លួនជនសង្ស័យខាងលើ ដែលកំពុងស្នាក់នៅផ្ទះជួល ស្ថិតសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ករណីទី២ ថ្ងៃទី១៣ ខែកុម្ភ: ឆ្នាំ២០២២០ ត្រង់ចំណុចផ្ទះជួលក្នុងបុរី «លឹម ឈាងហាក់» ស្ថិតភូមិម័ល សង្កាត់ដង្កោ ខណ្ឌដង្កោ ឃាត់ខ្លួនជនបរទេសចំនួន៣នាក់ ស្នាក់នៅខុសច្បាប់និងបទល្មើសផ្សេង

ជនបរទេសទាំង៣នាក់រួមមាន៖
១/ឈ្មោះ EMMANUEL SUNJAY អាយុ ៣១ ឆ្នាំ ជនជាតិនីហ្សេរីយ៉ា។
២/ឈ្មោះ GABRIEL PHILEP អាយុ ២១ ឆ្នាំ ជនជាតិនីហ្សេរីយ៉ា។
៣/ឈ្មោះ លីធី ង្វឿងថាវ ភេទស្រី អាយុ២៦ឆ្នាំ ជនជាតិវៀតណាម។
អ្នកទាំង០៣នាក់ស្នាក់នៅផ្ទះជួលក្នុងបុរី «លឹម ឈាងហាក់» ស្ថិតភូមិម័ល សង្កាត់ដង្កោ ខណ្ឌដង្កោ។

វត្ថុតាងដកហូតបាន៖
-លេបថប០៣គ្រឿង
-ទូរស័ព្ទ០៩គ្រឿង
-ដុំសម្រាប់ប្រើអ៉ីនធើណេត០២ដុំ
-ស៊ីមកាតមួយចំនួនធំ និងសម្ភារមួយចំនួនទៀត។

បច្ចុប្បន្ន ជនសង្ស័យទាំង៤នាក់ និងវត្ថុតាងត្រូវបានបញ្ជូនទៅសាលាដំបូងខេត្តកណ្តាល ចាត់ការតាមច្បាប់៕