ផ្ទះ ព័ត៌មានជាតិ យុវជនបើករថយន្...

យុវជនបើករថយន្តដឹកដីម្នាក់ ដើរជាន់ខ្សែលួសរាយទុកឆក់កណ្ដុរ បណ្ដាលឲ្យស្លាប់ នៅស្រុកល្វាឯម

0

កណ្ដាល: នគរបាលស្រុកល្វាឯម ចុះពិនិត្យសាកសពយុវជនម្នាក់ ស្លាប់ដោយសារដើរជាន់ខ្សែលួស ដែលគេរាយឆក់កណ្ដុរតាមភ្លឺស្រែ បង្កឲ្យមានការភ្ញាក់ផ្អើលឡើង កាលពីវេលាម៉ោង ១៤និង៣០នាទី ថ្ងៃទី២៦ ខែកុម្ភ: ឆ្នាំ២០២០ ត្រង់ចំណុចដីស្រែប្រាំងស្ពានព្រែកតាគង់ ស្ថិតក្នុងភូមិព្រែករៃ ឃុំព្រែករៃ ស្រុកល្វាឯម ខេត្តកណ្ដាល ។

ជនរងគ្រោះឈ្មោះ អ៊ូច សុផល អាយុ ២១ឆ្នាំជនជាតិខ្មែរ មុខរបរបើកបររថយន្តដឹកដី មានទីលំនៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល ។
ជនសង្ស័យជាម្ចាស់ដីស្រែឈ្មោះ សុខ ធឿន ភេទប្រុស អាយុ ៤២ឆ្នាំ ជនជាតិខ្មែរ មុខរបរ កសិករ មានទីលំនៅភូមិព្រែករៃ ឃុំព្រែករៃ ស្រុកល្វាឯម ខេត្តកណ្ដាល (គេចខ្លួន) ។

ដំណើររឿង៖​ នៅយប់ថ្ងៃទី២៥ ខែកុម្ភ: ឆ្នាំ២០២០ ជនសង្ស័យជាម្ចាស់ដីស្រែ បានរាយខ្សែលួសឆក់កណ្ដុរក្នុងដីស្រែរបស់គេ លុះមកដល់ថ្ងៃទី២៦ ខែកុម្ភ: ឆ្នាំ២០២០ វេលាម៉ោង ១៤និង៣០នាទី ជនសង្ស័យបានមកមើលស្រែ ស្រាប់តែឃើញជនរងគ្រោះស្លាប់ដោយសារជាន់ខ្សែលួសឆក់កណ្ដុរ ក៏តេទូរស័ព្ទមកសមត្ថកិច្ចប៉ុស្ដិ៍ ហើយក៏រត់គេចខ្លួនបាត់ស្រមោលតែម្ដង ។
បន្ទាប់ពីសមត្ថកិច្ចនគរបាលទទួលបានព័ត៌មានខាងលើ ភ្លាមនោះក៏ចុះមកដល់ចំណុចកើតហេតុ រួចធ្វើការពិនិត្យកោសល្យវិច័យឃើញថា ជនរងគ្រោះពិតជាស្លាប់ដោយសារជាន់ខ្សែលួសឆក់កណ្ដុរប្រាកដមែន ។

ក្រោយពីពិនិត្យរួច សាកសពជនរងគ្រោះ ត្រូវបានសមត្ថកិច្ចប្រគល់ឲ្យទៅក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕

មតិយោបល់