ភ្នំពេញ: កាលពីវេលាម៉ោង ៣ និង១៤នាទីរសៀលថ្ងៃទី៦ ខែមីនា ឆ្នាំ២០២០ ត្រង់ចំណុចមុខសាលាបឋមសិក្សាត្រពាំងរាំង លើមហាវិថីឈ្នះឈ្នះ ក្នុងភូមិផ្សារលិចសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ មានករណីគ្រោះថ្នាក់ចរាចរណ៍ រថយន្តធុនធំបុកពីក្រោយស្តារិច រងការខូចខាត និងបាក់បង្គោលសញ្ញាចរាចរណ៍អស់២ដើម។

រថយន្តបង្កម៉ាកគា ក្បាលរថយន្ត ពណ៌សលាយក្រហម ពាក់ផ្លាកលេខ ភ្នំពេញ 3B-9700 បើកបរដោយបុរសម្នាក់។ ចំណែករថយន្តម៉ាកស្តារិច ពណ៌ទឹកប្រាក់ ពាក់ផ្លាកលេខ ភ្នំពេញ 2AW- 1867 បើកបរដោយបុរសម្នាក់។

ដំណើររឿង៖ នៅមុនកើតហេតុ គេឃើញរថយន្ត ២គ្រឿងខាងលើ ធ្វើដំណើរពីកើតទៅលិច តាមបណ្តោយមហាវិថីឈ្នះឈ្នះ។ ដោយរថយន្តស្តារិច បើកខាងមុខរថយន្តបង្ក បើកខាងក្រោយ លុះមកដល់ចំណុចកើតហេតុ រថយន្តស្តារិច បានស៊ីញ៉ូឆ្វេង បំណងបត់ឆ្វេង តែមិនទាន់បានបត់ផង ក៏ត្រូវរថយន្តបង្កបុកពីក្រោយ ខ្ទាតទៅបុកបង្គោលសញ្ញាចរាចរណ៍ បណ្តាលឲ្យបាក់បង្គោលចំនួន២ដើម និងខូចខាតរថយន្តស្តារិចផ្នែកខាងក្រោយ។

ក្រោយកើតហេតុ សមត្ថកិច្ចមូលដ្ឋាន បានមកដល់ និង ទាក់ទងជំនាញ ចុះវាស់វែងយករថយន្តទាំង២គ្រឿង ព្រមទាំងអ្នកបើក ទៅកាន់ការិយាល័យចរាចរណ៍ផ្លូវគោក រាជធានី រង់ចាំដោះស្រាយជាក្រោយ៕