ភ្នំពេញៈ នៅវេលាម៉ោង ៨និង២០នាទីយប់ថ្ងៃទី៩ ខែមីនា ឆ្នាំ២០២០ មានករណីគ្រោះថ្នាក់ចរាចរណ៍រថយន្តកៀរម៉ូតូ ស្ថិតតាមបណ្ដោយផ្លូវលីយ៉ុងផាត់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។

ជនរងគ្រោះឈ្មោះ ប៉ោ ចន្ថា ភេទស្រី អាយុ ៤១ឆ្នាំ (ស្លាប់) នៅកន្លែងកើតហេតុ បើកបរម៉ូតូម៉ាក Zoomer X មួយគ្រឿង ពណ៌ខៀវ ពាក់ស្លាកលេខ ភ្នំពេញ 1FW-8106 មានស្រុកកំណើតឃុំតាំងក្រាំង ស្រុកជើងព្រៃ ខេត្តកំពង់ចាម ក្នុងបន្ទុកគ្រួសារមានកូនស្រី១ កូនប្រុស១។

ដំណើររឿង៖ មុនពេលកើតហេតុគេឃើញស្រ្តីរងគ្រោះ បើកបរម៉ូតូចុះពីស្ពានលីយ៉ុងផាត់ លុះមកដល់ចំណុចកើតហេតុ ត្រូវរថយន្តបង្កមិនចាំម៉ាកកៀរ បណ្ដាលឲ្យស្លាប់ ហើយបើករត់គេចបាត់ស្រមោល ចំពោះសាកសព សាច់ញាតិមកយកទៅធ្វើបុណ្យនៅឯស្រុកកំណើត៕