កណ្ដាល: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ បើកម៉ូតូមិនប្រកាន់ស្ដាំ ដោយល្បឿនលឿន បានបុកជាមួយម៉ូតូមួយគ្រឿងទៀតប្រភេទសណ្ដោងរ៉ឺម៉ក បណ្ដាលឲ្យបុរសជាអ្នកបើកបរម៉ូតូសណ្ដោងរ៉ឺម៉ករងរបួសធ្ងន់ ។ ហេតុការណ៍គ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង២០និង៣០នាទី ថ្ងៃទី២៩ ខែមីនា ឆ្នាំ២០២០ លើផ្លូវលេខ២៦១ ចំណុចភូមិកំពង់ប្រាសាទ ឃុំស្វាយអំពារ ស្រុកមុខកំពូល ខេត្តកណ្ដាល ។
ជនរងគ្រោះឈ្មោះ ជាម រិទ្ធ ភេទប្រុស អាយុ៤៥ឆ្នាំ មានទីលំនៅភូមិស្ពានថ្មី ឃុំរកាកោង២ ស្រុកមុខកំពូល ខេត្តកណ្ដាល បើកបរម៉ូតូម៉ាកសង់កូរ៉េ ធុនសេ100 ពណ៌ក្រហម គ្មានផ្លាកលេខ ។ ចំណែកភាគីម៉ូតូបង្កម៉ាកហុងដាឌ្រីម ធុនសេ១២៥ ពាក់ផ្លាកលេខ កណ្ដាល1AF-9729 បើកបរដោយឈ្មោះ វ៉ាន វ៉ុន ភេទប្រុស អាយុ៤៧ឆ្នាំ មានទីលំនៅភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្ដាល (ឃាត់ខ្លួន) ។
ដំណើររឿង៖ នៅមុនពេលកើតហេតុ គេបានឃើញជនរងគ្រោះបើកបរម៉ូតូសណ្ដោងរ៉ឺម៉ក ធ្វើដំណើរតាមបណ្ដោយផ្លូវលេខ២៦១ ក្នុងទិសដៅពីជើងទៅត្បូង លុះមកដល់ចំណុចកើតហេតុ ស្រាប់តែមានម៉ូតូហុងដាឌ្រីមមួយគ្រឿង បើកក្នុងទិសដៅបញ្ច្រាសគ្នា ដោយមិនប្រកាន់ស្ដាំក៏មកបុកម៉ូតូជនរងគ្រោះពេញមួយទំហឹង បណ្ដាលឲ្យជនរងគ្រោះជាអ្នកបើកបរម៉ូតូសណ្ដោងរ៉ឺម៉ករងរបួសធ្ងន់ ។
ក្រោយពីមានហេតុការណ៍កើតឡើង ជនរងគ្រោះត្រូវបានដឹកបញ្ជូនទៅព្យាបាលនៅមន្ទីរពេទ្យប្រតិបត្ដិស្រុក រីឯមធ្យោបាយពាក់ព័ន្ធត្រូវបានសមត្ថកិច្ចនគរបាលជំនាញ ធ្វើការពិនិត្យ និងវាស់វែង រួចដកហូតយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីផ្លូវច្បាប់ ៕
មតិយោបល់