ភ្នំពេញ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា លោកវរសេនីយ៍ឯក ជា ចិត្រា នាយការិយាល័យស៊ើបអង្កេត និងអនុវត្តនីតិវិធី បានឲ្យដឹងថាកម្លាំងជំនាញបានបញ្ជូនជនបរទេសម្នាក់ ទៅនាយកដ្ឋានស៊ើបអង្កេតនិងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់ នៅថ្ងៃទី០២ ខែមេសា ឆ្នាំ២០២០ វេលាម៉ោង ២និង៣០នាទីរសៀល។
លោកនាយការិយាល័យស៊ើបអង្កេត និងអនុវត្តនីតិវិធី បន្តថា ការបញ្ជូនជនបរទេសខាងលើ ដោយបានការអនុញ្ញាតពីឯកឧត្តម ឧត្តមសេនីយ៍ឯក អគ្គស្នងការរង និងជាស្នងការនគរបាលរាជធានីភ្នំពេញ និងលោកស្នងការរងទទួលផែនការងារអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ។
លោកវរសេនីយ៍ឯក ជា ចិត្រា បានបន្ថែមថាជនបរទេសនោះឈ្មោះ LEWIS JEFFREY COOK ភេទប្រុស អាយុ ៦៤ឆ្នាំ ជនជាតិអាមេរិក បានឃាត់ខ្លួនកាលពីថ្ងៃទី២៩ ខែមីនា ឆ្នាំ២០២០ វេលាម៉ោង ១និង៣០នាទីរសៀល និងបានទទួលជនបរទេសនោះ ពីមណ្ឌលសុខភាពចាក់អង្រែ ពីបទសង្ស័យមានមេរោគកូវីដ-១៩ និងគ្មានលិខិតឆ្លងដែនជាប់នឹងខ្លួន។
បន្ទាប់ពីធ្វើការសាកសួរដឹងថា ជននេះចូលមកព្រះរាជាណាចក្រកម្ពុជាជាច្រើនដង លើកចុងក្រោយនៅខែមករា ឆ្នាំ២០២០ តាមច្រកអាកាសយានដ្ឋានអន្តរជាតិភ្នំពេញ គោលបំណងទេសចរ ស្នាក់នៅផ្ទះសំណាក់មានលាភ២។ ដោយនៅថ្ងៃទី២៥ ខែមីនា ឆ្នាំ២០២០ ជននេះបានចូលទៅក្នុងទូរដកប្រាក់ (ATM) មួយចំនួន នៅរាជធានីភ្នំពេញ ហើយបានយកលុយក្លែងក្លាយដែលមានសរសេរពីសាសនា ព្រះយ៊េស៊ូ ដោយស្ដោះទឹកមាត់ដាក់ និងយកទុកលើទូរដកប្រាក់ (ATM) ក្រោយមកកម្លាំងនគរបាល បានឃាត់ខ្លួនបញ្ជូនទៅ មណ្ឌលសុខភាពចាក់អង្រែ ដើម្បីតាមដានជំងឺ រហូតដល់ថ្ងៃទី២៨ ខែមីនា ឆ្នាំ២០២០ លទ្ធផលរបស់មន្ទីរពិសោធន៍ប៉ាស្ទ័រ ការពិនិត្យទទួលបានលទ្ធផលអវិជ្ជមាន និងបានពិនិត្យ ទឹកនោមរកសារធាតុញៀន ជាលទ្ធផលអវិជ្ជមាន។ ជននេះធ្លាប់ជាប់ពន្ធនាគារ ចំនួន០២ដង នៅសហរដ្ឋអាមេរិក លើកទី១ នៅឆ្នាំ១៩៩១ រយ:ពេល១៦ខែ ពីបទ ដុតបំផ្លាញព្រៃឈើនៅរដ្ឋកាលីហ្វញ៉ា និងលើកទី២ ឆ្នាំ២០០៧ រយ:ពេល ០១ខែ នៅរដ្ឋវ៉ាស៊ីនតោន។បច្ចុប្បន្នគ្មានលិខិត ឆ្លងដែនជាប់នឹងខ្លួន (លិខិតឆ្លងដែន ជននេះបានយកទៅអគ្គនាយកដ្ឋានអន្តោប្រវេសន៍ ដើម្បីបន្ត ទិដ្ឋាការស្នាក់នៅ)។
លោកវរសេនីយ៍ឯក ជា ចិត្រា នាយការិយាល័យស៊ើបអង្កេត និងអនុវត្តនីតិវិធី បានបញ្ជាក់ថាសន្និដ្ឋាន-មានចេតនាបំពុលសភាពការណ៍សង្គម ក្នុងខណ:ពិភពលោកកំពុងនាំគ្នាប្រយុទ្ធប្រឆាំង ការពារ ការរីករាលដាលនៃជំងឺកូវីដ-១៩។ -ធ្លាប់ជាប់ពន្ធនាគារចំនួន០២លើក។ -ពុំមានការសហការល្អ ជាមួយសមត្ថកិច្ច ៕
មតិយោបល់