ភ្នំពេញៈ កាលពីវេលាម៉ោង២០និង៣០នាទីថ្ងៃទី២១ ខែមេសា ឆ្នាំ២០២០ ជនសង្ស័យម្នាក់ បានធ្វើសកម្មភាពលួចម៉ូតូ០១គ្រឿងម៉ាក ហុងដា ប៊ីត ពណ៌ក្រហមលាយស ផ្លាកលេខ កណ្តាល 1AH-3356 នៅចំណុចមុខបន្ទប់ជួល ផ្លូវ១០៣ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

ជនសង្ស័យឈ្មោះ ឃីម សេរីរ័ត្ន ភេទស្រី អាយុ២១ឆ្នាំ ត្រូវបានកម្លាំងមូលដ្ឋានអាវុធហត្ថខណ្ឌទួលគោក ឃាត់ខ្លួនបានកាលពីថ្ងៃទី២៤ ខែមេសា ឆ្នាំ២០២០ វេលាម៉ោង១៦និង១០នាទី នៅចំណុច ផ្លូវ១៩២ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ខណៈដែលជនសង្ស័យយកម៉ូតូបំរ៉ុងទៅបញ្ចាំ ។

ក្រោយពេលឃាត់ខ្លួនបានជនសង្ស័យ សារភាពថា ខ្លួនពិតជាបានលួចម៉ូតូខាងលើ ពិតប្រាកដមែន ហើយបានជិះទៅផ្ញើនៅម្តុំផ្សារទួលគោក សង្កាត់ទឹកល្អក់២ បន្ទាប់មកបានយកម៉ូតូខាងលើបំរ៉ុងទៅបញ្ចាំ ស្រាប់តែកម្លាំងអាវុធហត្ថមកឃាត់ខ្លួន ។

នៅព្រឹកថ្ងៃទី២៧ ខែមេសា ឆ្នាំ២០២០ សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានកសាងសុំណុំរឿងបញ្ជូនជនសង្ស័យទៅតុលាការ ដើម្បីផ្តន្ទាទោសតាមច្បាប់ ៕