ភ្នំពេញៈ កាលពីវេលាម៉ោង ៧ និង ៣០នាទីព្រឹកថ្ងៃទី០៥ ខែឧសភា ឆ្នាំ ២០២០ មានករណីបុរសម្នាក់ ដេកស្លាប់នៅក្នុងរថយន្ត ត្រង់ចំណុចចំណោតតាបាវ ស្ថិតក្នុងភូមិព្រែកស្មាច់ ឃុំកោះស្តេច ស្រុកគិរីសាគរ។

ជនរងគ្រោះឈ្មោះ សុខ តាក់ ភេទប្រុស អាយុ២៣ឆ្នាំ ជនជាតិខ្មែរ មុខរបរអ្នកបើករថយន្តដឹកដី ស្នាក់នៅភូមិដំណាក់ត្រាច ឃុំដំបូករូង ស្រុកភ្នំស្រួច ខេត្តកំពង់ស្ពឺ។

ប្រភពបងប្រុសជនរងគ្រោះ បានប្រាប់ឲ្យដឹងថា
ដោយរថយន្តខូច ទើបពួកគាត់ បានចតដេកនៅទីតាំងខាងលើតែម្ដង។ លុះព្រឹកឡើង មិនទាន់ឃើញប្អូនប្រុសភ្ញាក់ពីគេង ក៏ដើរទៅមើល ទើបដឹងថា ប្អូនបានដេកស្លាប់ក្នុងរថយន្តបាត់ទៅហើយ។

ក្រោយទទួលបានព័ត៌មាន សមត្ថកិច្ច បានចុះត្រួតពិនិត្យសពជនរងគ្រោះ សន្និដ្ឋានថា ស្លាប់ដោយសារខ្យល់គ រួចក៏ប្រគល់សពជូនសាច់ញាតិ យកទៅធ្វើបុណ្យតាមប្រពៃណី៕