កណ្ដាលៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា កើតហេតុនៅថ្ងៃពុធ១៥កើត ខែពិសាខ ឆ្នាំជូតទោស័ក ព.ស២៥៦៤ ត្រូវនឹងថ្ងៃទី០៦ ខែឧសភា ឆ្នាំ២០២០ វេលាម៉ោង២១និង៣០នាទី នៅចំណុចភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល ។ ជនរងគ្រោះឈ្មោះ រី សាវ៉ាង ភេទស្រី អាយុ៤៩ ឆ្នាំ ជនជាតិខ្មែរ មានទីលំនៅកើតហេតុ (ម្តាយបង្កើត)។ ជនសង្ស័យ (ឃាត់ខ្លួន) ឈ្មោះ រ៉ា រតន: ហៅ (យ័ន) ភេទប្រុស អាយុ៣៣ ឆ្មាំ ជនជាតិខ្មែរ មុខរបរមិនពិតប្រាកដ មានទីលំនៅភូមិ-ឃុំកើតហេតុត្រូវជាកូនបង្កើត (ឃាត់ខ្លួន) ។
សម្ភារ:ខូចខាតរួមមាន៖ ១-កៅអីជ័រចំនួន០២ពណ៌ក្រហម ។ ២-ជើងគ្រែឈើបាក់ចំនួន០៤ ។ ៣-មុងរហែក០១ពណ៌ស្វាយ ។ ៤-ខ្នើយរហែក ០២ពណ៌ខ្មៅ ០១ពណ៌ក្រហម០១ ។
វត្ថុតាងចាប់យកមាន ៖ ១-កន្តៀវផ្លែដែកដងឫស្សីប្រវែង៣៥ស.មចំនួន០១។ ២-កាំបិតតាំងតោ ចំនួន០១ ប្រវែង២៥ ស.ម ។
សភាពនៃរឿងហេតុ នៅថ្ងៃខែឆ្នាំវេលាម៉ោងកើតហេតុខាងលើ ឈ្មោះ រ៉ា រតនៈ បានរករឿងជេរបញ្ចោរ ឈ្មោះ រី សាវ៉ាង ភេទ ស្រី ត្រូវជាម្តាយបង្កើតរបស់ខ្លួនហើយនៅវេលាម៉ោង ២១និង៣០ នាទី ឈ្មោះ រ៉ា រតនៈ បានជេរប្រមាថ ជនរងគ្រោះ (ម្តាយ) ម្តងទៀតរួចបានបំផ្លិចបំផ្លាញ ទ្រព្យសម្បត្តិក្នុងផ្ទះ មួយចំនួន ដូចបានរៀបរាប់ខាងលើ ឃើញដូច្នេះ ជនរងគ្រោះ បានមកដាក់ពាក្យ បណ្ដឹងនៅប៉ុស្ដិ៍នគរបាលរដ្ឋបាលកំពង់ស្វាយ ក្រោយពីទទួលបណ្តឹងរួចហើយ កម្លាំងប៉ុស្តិ៍នគរបាលរដ្ឋបាលកំពង់ស្វាយបានចុះដល់កន្លែងកើតហេតុឃាត់ខ្លួន ជនសង្ស័យរួមទាំងវត្ថុតាងខាងលើយកមកប៉ុស្តិ៍ ដើម្បីធ្វើការសាកសួរបំភ្លឺនិងកសាងសំណុំរឿងបញ្ជូនទៅអធិការដ្ឋាននគរបាលស្រុកកៀនស្វាយ ដើម្បីបន្តចាត់ការតាមនីតិវិធី ។
បញ្ជាក់ (ជនសង្ស័យជាមនុស្សប្រើប្រាស់ថ្នាំញៀន និងធ្លាប់បានធ្វើកិច្ចសន្យាអប់រំ នៅប៉ុស្តិ៍នគរបាលរដ្ឋបាលកំពង់ស្វាយចំនួន០១លើករួចមកហើយ ក្នុងករណីហិង្សាក្នុងគ្រួសារ ) ៕
មតិយោបល់