ភ្នំពេញ: ដំណើរទស្សនកិច្ចរបស់លោក ហ៊ុន ម៉ាណែត បុត្រាច្បងរបស់សម្តេចនាយករដ្ឋមន្ត្រី ហ៊ុន សែន ដើម្បីស្វែងរកការបង្រួបបង្រួម រវាងជាតិសាសន៍ខ្មែរ នៅក្រៅប្រទេស ត្រូវគេឃើញថា បានទទួលការគាំទ្រ គួរកត់សម្គាល់ បើទោះជាមានប្រជាពលរដ្ឋខ្មែរ មួយចំនួនតូច នៅក្រៅប្រទេសនោះ បានធ្វើការប្រឆាំងតវ៉ា ក៏ដោយ។

លោក ហ៊ុន ម៉ាណែត បានធ្វើដំណើរ ឆ្លងកាត់ ទ្វីបចំនួន៣ ក្នុងរយៈពេល មិនដល់មួយឆ្នាំផងនោះទេ ដើម្បីជួបប្រជាពលរដ្ឋខ្មែរ ជាច្រើនពាន់នាក់។ ដែលដំណើរចុងក្រោយនេះ គឺបានបញ្ចប់នៅសហរដ្ឋអាមេរិក និងកាណាដា ដែលផ្ទុយពីការផ្សាយភូតកុហក មួយចំនួន ដែលលើកឡើងថា លោក ហ៊ុន ម៉ាណែត ត្រូវអាជ្ញាធរអាមេរិក ឃាត់សួរនាំ ពាក់ព័ន្ធនឹងករណីចោទប្រើអំពើហិង្សា ឬករណីចោទទៅតុលាការ ICC នោះទេ។ ក្នុងដំណើរទៅកាន់ប្រទេសចំនួន៤ ក្នុងទ្វីបអឺរ៉ុប ដើម្បីជួបប្រជាពលរដ្ឋខ្មែរ រួមមានប្រទេស បារាំង អាល្លឺម៉ង់ ស្វីស និងប៊ែលហ្សីក លោកបានទទួលការស្វាគមន៍ ពីបងប្អូនខ្មែរ ជាច្រើននាក់នៅទីនោះ និងបានលើកឡើង អំពីការអភិវឌ្ឍន៍ និងស្ថានភាពពិតរបស់ប្រទេសកម្ពុជា បច្ចុប្បន្ន ដែលមិនមែនជាស្ថានភាព កម្ពុជា គ្រាន់តែសារព៏ត៌មានប៉ុណ្ណោះទេ។

បន្ទាប់ពីដំណើរទស្សនកិច្ចនៅអ៊ឺរ៉ុប កាលពីចុងឆ្នាំ២០១៥ លោក ហ៊ុន ម៉ាណែត បានអញ្ជើញធ្វើដំណើរ ទៅកាន់ប្រទេសចិន និងក្រោយមកនេះ ក្នុងខែមេសាឆ្នាំ២០១៦ លោក ក៏បានបន្តដំណើទៅកាន់ប្រទេសកូរ៉េខាងត្បូង ដើម្បីជួបពលករខ្មែរ ដែលកំពុងធ្វើការនៅទីនោះ បើទោះបីជាមានការគម្រាម ធ្វើបាតុកម្មប្រឆាំងនោះក្តី ប៉ុន្តែការធ្វើបាតុកម្មមិនអាចកើតមានឡើងនោះឡើយ ដោយសារតែភាពចាស់ទុំខាងនយោបាយ និងភាពសាមញ្ញរបស់លោក បានរឹតតែញ៉ាំង ឲ្យក្រុមបាតុករមកជួបលោក និងងាកមកជួបជុំគ្នា និងស្វែងយល់អំពីការពិត ដែលកើតមានឡើង មិនដូចអ្វីដែលសារព៏ត៌មាន ផ្សព្វផ្សាយមិនពិតនោះទេ។ លើសពីនេះ លោក ហ៊ុន ម៉ាណែត ក៏បានសន្យាជួយបង្កើនពលករឲ្យបានច្រើន ក្នុងឆ្នាំ២០១៦នេះ និងសន្យាសម្រួលភាពលំបាករបស់ពលករខ្មែរ បញ្ចប់នូវបញ្ហាមិនប្រក្រតីនានា ពិសេសក៏មានការផ្លាស់ប្តូរ ឯកអគ្គរាជទូតថ្មី ប្រចាំនៅប្រទេសកូរ៉េខាងត្បូង ថែមទៀត។

នៅខែមេសា ដដែល ក្នុងគ្រាដែលប្រជាពលរដ្ឋនានា ក្នុងប្រទេសកម្ពុជា អបអរសាទរក្នុងពិធីបុណ្យចូលឆ្នាំខ្មែរ ជួបជុំក្រុមគ្រួសារនោះ លោក ហ៊ុន ម៉ាណែត ត្រូវគេឃើញថា បានដឹកនាំក្រុមការងារចេញទៅ ទ្វីបអាមេរិក ចំនួន ៤រដ្ឋ ដើម្បីប្រារព្វពិធីបុណ្យចូលឆ្នាំប្រពៃណីខ្មែរ ជាមួយបងប្អូនខ្មែរ នៅក្រៅប្រទេសនោះទៅវិញ បើទោះបីជាដឹងថា មានក្រុមបាតុករមួយចំនួន បានត្រៀមប្រឆាំងរូបលោក នៅពេលដែលទៅដល់នោះក្តី។ រដ្ឋទី១ ដែលលោកបានទៅដល់ គឺ រដ្ឋកាលីហ្វញ៉ា បើទោះបីជាក្រុមបាតុករបានប្រើអំពើហិង្សា ប៉ុន្តែលោក ហ៊ុន ម៉ាណែត និងក្រុមការងារ បានធ្វើពិធីជួបជុំបងប្អូនខ្មែរ ដោយជោគជ័យ និងមានអ្នកចូលរួមគាំទ្រ លើសពីការគ្រោងទុក។

លោក ហ៊ុន ម៉ាណែត និងក្រុមការងារ រួមទាំងអ្នកចូលរួមទាំងអស់ បានរងការប្រើហិង្សារបស់បាតុករ ដោយសារចោលវត្ថុរឹង ទៅលើ និងរហូតដល់ប្រើផ្សែងម្រេច បាញ់បង្ហូរទឹកភ្នែក ក៏ពួកគេ នៅតែអាចចូលទៅជួបបងប្អូនខ្មែរ និងបានសំណេះសំណាល លើកឡើងនូវរឿងរ៉ាវពិតរបស់កម្ពុជា ជូនដល់បងប្អូនខ្មែរ ដែលចូលរួមស្តាប់។ ក្នុងរដ្ឋកាលីហ្វញ៉ា លោក ហ៊ុន ម៉ាណែត បានទទួលការស្វាគមន៍ ពីអាជ្ញាធរអាមេរិក នៃសង្កាត់ Signal Hill ជុំវិញការធ្វើពិធី ដង្ហែក្បួនព្យុះហយាត្រា ចូលឆ្នាំខ្មែរនៅទីក្រុង Long Beach រដ្ឋកាលីហ្វញ៉ា ។ បើទោះបីជាមិនបានចូលរួមក្នុងពិធីដង្ហែក្បួន ដើម្បីកុំឲ្យខ្មែរមានជម្លោះរវាងខ្មែរ និងខ្មែរនោះក្តី លោកនៅបានប្រគល់សម្ភារៈសម្រាប់ដង្ហែក្បួន ដើម្បីបង្ហាញអំពីប្រពៃណីវប្បធម៌របស់ខ្មែរ ក្នុងទឹកដីអាមេរិក ពិសេស គឺការរៀបចំឲ្យមានការតាំងពិព័រណ៌ ដែលមានការចូលរួមពីក្រសួងស្ថាប័ននានា ដូចជា ក្រសួងទេសចរណ៍ ក្រសួងវប្បធម៌ សភាពាណិជ្ជកម្ម និងអង្គការសមាគមន៍ មួយចំនួនទៀត។

ទី២ រដ្ឋ Washington State លោក ហ៊ុន ម៉ាណែត បានធ្វើដំណើរទៅដល់ និងបានជួបបងប្អូនខ្មែរ នៅ Seattle និង Tacoma ដែលភាគច្រើន ជាជនជាតិអ៊ីស្លាម។ ក្នុងពិធីជួបជុំ ពិសារអាហារសាមគ្គីមហាគ្រួសារខ្មែរមួយ លោក ហ៊ុន ម៉ាណែត បានលើកឡើង អំពីសិទ្ធសេរីភាពរបស់ប្រជាពលរដ្ឋខ្មែរ និងការអភិវឌ្ឍ នានាពេលបច្ចុប្បន្ន។ នាឪកាសនោះដែរ លោកបានជួបជាមួយ តំណាងព្រឹទ្ធសភាអាមេរិក នៅទីនោះ និងអភិបាលក្រុង Seattle ដែលបានជជែកច្រើន ទៅលើកិច្ចសហប្រតិបត្តិការ រវាងទីក្រុងទាំង២ និងគ្រោងផ្សារភ្ជាប់ ឲ្យក្លាយទៅជា Sister City ថែមទៀត។

ទី៣ រដ្ឋតិចសាស លោក ហ៊ុន ម៉ាណែត បានធ្វើដំណើរបន្តទៅកាន់ ដើម្បីជួបបងប្អូនខ្មែរ ពិសេសជួបជាមួយ ពាណិជ្ជកររបស់រដ្ឋតិចសាស និងអភិបាលក្រុង Houston ទៀតផង។ ហើយប្រជាពលរដ្ឋខ្មែរ បានសម្តែងការគាំទ្រ ដំណើរមកដល់របស់លោក ហ៊ុន ម៉ាណែត នាឱកាសនោះ យ៉ាងច្រើនកករ ដែលនេះបង្ហាញឲ្យឃើញ ពីចេតនានៃដំណើរបំពេញភារកិច្ច បង្រួបបង្រួបជាតិសាសន៍ខ្មែរ តែមួយ បើទោះជាមានគំនិតគាំទ្រ ឬការរស់នៅក្នុងស្ថានភាពប្រទេស ប្រកាន់របបបែបណាក៏ដោយ តែខ្មែរត្រូវតែស្រលាញ់ខ្មែរ។

សូមបញ្ជាក់ថា ដំណើរបំពេញទស្សនកិច្ច ដើម្បីស្វែងរកការបង្រួបបង្រួម រវាងជាតិសាសន៍ខ្មែរ នៅក្រៅប្រទេស កាលពីដើមខែមេសានោះ នឹងវិលត្រឡប់មកដល់មាតុប្រទេសវិញ នៅព្រឹកថ្ងៃទី២៥ ខែមេសា នេះវិញហើយ សាធារណជន បានមើឃឃើញថា នេះជាការបំពេញភារកិច្ចជូនជាតិ ដ៏ជោគជ័យមួយ យ៉ាងធំធេង៕