ភ្នំពេញៈ កាលពីវេលាម៉ោង០១និង១២នាទីយប់ថ្ងៃទី១៦ ខែមិថុនា ឆ្នាំ២០២០ មានករណីគ្រោះថ្នាក់ចរាចរណ៍ បង្កឡើងដោយនារីរូបស្អាតម្នាក់ស្រវឹងស្រា បើករថយន្ដស៊េរីទំនើប តម្លៃរាប់ម៉ឺនដុល្លារ បើកបុកក្បាលនាគ ពុះចែកទ្រូងផ្លូវ បណ្តាលឲ្យបាក់អស់ចំនួន១កង់ រថយន្ដរងការខូចខាតខ្ទេចផ្នែកខាងមុខទាំងស្រុង នៅតាមបណ្ដោយផ្លូវព្រះនរោត្ដម ជិតស្ដុបចំការមន ស្ថិតក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។

ដំណើររឿង៖ នៅមុនពេលកើតហេតុ គេបានឃើញរថយន្ដស៊េរីទំនើប១គ្រឿងម៉ាក Range Rover ពណ៌ស ពាក់ផ្លាកលេខភ្នំពេញ 2BJ-4545 បើកបរដោយនារីរូបស្អាតម្នាក់ ទំនងស្រវឹងស្រា បើកបរក្នុងទិសដៅពីទិសខាងជើង ទៅទិសខាងត្បូង ក្នុងស្ថានភាពល្បឿនលឿន លុះមកដល់ចំណុចកើតហេតុ បានរេចង្កូតទៅបុកក្បាលនាគពុះចែកទ្រូងផ្លូវ បណ្តាលឲ្យបាក់អស់ចំនួន១កង់ រថយន្ដបានក្រឡាប់ មិនទាន់អស់ល្បឿនអូសជាង៦០ម៉ែត្រ រងការខូចខាតខ្ទេចផ្នែកខាងមុខទាំងស្រុង ម្ចាស់រថយន្ដបង្ក បានរងរបួស ។ ភ្លាមនោះក៏មានរថយន្ដ១គ្រឿង ដែលធ្វើដំណើរតាមក្រោយ បានស្គាល់ដឹកយកទៅកាន់មន្ទីរពេទ្យ ដើម្បីជួយសង្រ្គោះ ។

ក្រោយពេលកើតហេតុ សមត្ថកិច្ចបានចុះទៅដល់ទីតាំងខាងលើ បានទាក់ទងជំនាញច្បាប់ចរាចរណ៍ផ្លូវគោក ធ្វើការវាស់វែង យករថយន្ដបង្កទៅរក្សាទុក នៅការិយាល័យចរាចរណ៍ជើងគោក នៃស្នងការរាជធានីភ្នំពេញ រង់ចាំម្ចាស់រថយន្តបង្កចូលខ្លួនដោះស្រាយ តាមនីតិវិធីផ្លូវច្បាប់​ ៕