ព័ត៌មានជាតិ

សមត្ថកិច្ចឃាត់ខ្លួនជនសង្ស័យ ២នាក់ ករណីលួចកាត និងទូរស័ព្ទសរុបជាទឹកប្រាក់ ៤ពាន់ដុល្លារ

បាត់ដំបង: នៅថ្ងៃទី២២ ខែមិថុនា ឆ្នាំ២០២០ វេលាម៉ោង ៥និង៥០នាទីអនុវត្តតាមមតិដឹកនាំរបស់លោក អ៊ុច សុខុន ស្នងការ នៃស្នងការដ្ឋាននគរបាល ខេត្តបាត់ដំបង ព្រមទាំងអនុវត្តតាមមតិណែនាំជំនាញពីលោកវរសេនីយ៍ទោ លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ ក្រុមអន្តរាគមន៍បង្ការបង្រ្កាបបាន សហការជាមួយកម្លាំងការិយាល័យជំនាញ នគរបាលព្រហ្មទ័ណ្ឌកម្រិតស្រាលដែល មានលោកវរសេនីយ៍ទោ ឈឿង គឹមសុង ជានាយការិយាល័យចុះប្រតិបត្តិការ បង្ក្រាបករណីលួចទ្រព្យសម្បត្តិប្រជាពលរដ្ឋ (កាតទូរស័ព្ទដៃ និងក្រវិលកំប៉ុងស្រាបៀរ ) មួយករណីនៅចំណុចភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

ក្នុងកិច្ចប្រតិបត្តិការនេះបានធ្វើការឃាត់ខ្លួនជន សង្ស័យចំនួន០២នាក់ គឺ៖
១-ឈ្មោះ រឿន ចាន់រិទ្ធ ហៅ សល់ អាយុ ២៦ឆ្នាំ មានទីលំនៅភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង (ជាអ្នកផ្តើមគំនិត)។
២-ឈ្មោះ ឡា ពោ ភេទប្រុស អាយុ ១២ឆ្នាំ (ទីលំនៅមិនប្រាកដ) ជាអ្នកដៃដល់ក្នុងការប្រព្រឹត្ត។

ក្នុងនោះធ្វើការដកហូតបាន៖
-កាតទូរសព្ទដៃ សែលខាត Cellcard ប្រភេទទឹក ប្រាក់ចំនួន ០១ដុល្លារចំនួន ១២០សន្លឹក
-ក្រវិលស្រាបៀរត្រូវរង្វាន់មួយចំនួន។

កាលពីថ្ងៃទី២២ ខែមិថុនា ឆ្នាំ២០២០ វេលាម៉ោង ១១និង៣៣នាទី ជនសង័្សយ បានធ្វើសកម្មភាពលួចទ្រព្យសម្បត្តិរបស់ជនរងគ្រោះឈ្មោះ អ៊ឹង សេង ភេទប្រុស អាយុ ៣៩ឆ្នាំ មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង ដែលប្រពន្ធរបស់គាត់មាន មុខរបរលក់ចាប់ហួយ ក្នុងលំនៅដ្ឋានខាងលើ ។

សម្ភារ:បាត់បង់រួមមាន៖
-កាតទូរស័ព្ទដៃ សរុបចំនួន ០៤ពាន់ដុល្លារ (កាតសែលកាតCellcard ៥០០ដុល្លារ , កាត ស្មាត Smart ចំនួន ១,៥០០ ដុល្លារ , កាតមិត្តហ្វូន Metfone ចំនួន១,២០០ ដុល្លារ , និងកាត រាយចំនួន ៨០០ ដុល្លារ )
-ក្រវិលកំប៉ុងស្រាបៀរត្រូវរង្វាន់ចំនួន ០២ថង់ (ទម្ងន់ ៥គីឡូ) ។

ជនសង័្សយបានយកកាតទូរស័ព្ទ និងក្រវិលកំប៉ុងដែលលួចបានទៅលក់ភ្លាមៗ ដែលពេលនេះសមត្ថកិច្ចកំពុងស្រាវជ្រាវរកអ្នកទទួលទិញផល ចោរកម្មដើម្បីដកហូត និងកសាងសំណុំរឿង បញ្ជូនទៅសាលាដំបូងខេត្តបាត់ដំបងចាត់ ការបន្តតាមនីតិវិធី៕

មតិយោបល់