ភ្នំពេញៈ យុវជនម្នាក់បានធ្វើសកម្មភាពចូលក្នុងផ្ទះប្រជាពលរដ្ឋលួចយកលុយ តែត្រូវបានម្ចាស់ផ្ទះឃើញទាន់ស្រែកចោរៗ ហើយត្រូវបានអ្នកជិតខាងដេញចាប់បានប្រគល់ឲ្យសមត្ថកិច្ចកាលពីម៉ោង០៩និង៣០នាទីព្រឹកថ្ងៃទី០៥សីហា នេះ នៅផ្ទះលេខ៣៤៤ ផ្លូវលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។

ជនសង្ស័យឈ្មោះ ឥដ្ឋ ស្នាល អាយុ១៨ឆ្នាំមុខរបរកម្មករសំណង់ស្នាក់នៅការដ្ឋាន ភូមិបាយ៉ាបសង្កាត់ភ្នំពេញថ្មីខណ្ឌសែនសុខនិងមានស្រុកកំណលតខេត្តព្រៃវែង។ ចំណែកម្ចាស់ផ្ទះឈ្មោះ ឈួន មៀវគួង ភេទស្រី អាយុ៣៩ឆ្នាំមុខរបរលក់ដូរស្នាក់នៅផ្ទះលេខ៣៤៤ ផ្លូលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។

ម្ចាស់ផ្ទះបានប្រាប់សមត្ថកិច្ចថា នៅមុនកើតហេតុម្តាយគាត់កំពុងអង្គុយរាប់លុយក្នុងផ្ទះ ខណៈដែលភ្លេចខ្លួនស្រាប់តែជនសង្ស័យបានដើរចូលទៅហើយធ្វើសកម្មភាពលួចយកលុយមួយបាច់១លានរៀលដើរចេញមកក្រៅ ពេលនោះម្តាយគាត់ឃើញទាន់ក៏ស្រែកចោរៗហើយត្រូវបានអ្នកជិតខាងចាប់ជាប់និងបានដកហូតលុយមកវិញ ចំណែកជនសង្ស័យបានប្រគល់ឲ្យនគរបាលប៉ុស្តិ៍ភ្នំពេញថ្មីយកទៅធ្វើការសាកសួរ។

នៅចំពោះមុខសមត្ថកិច្ចជនសង្ស័យបានបានសារភាពថា ពិតជាបានធ្វើសកម្មភាពលួចលុយខាងលើពិតប្រាកដមែន បច្ចុប្បន្នជនសង្ស័យបានកសាងសុំណុំរឿង និងឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ៕